بدرية طلبة: بقدم شخصية بنت لعوب في مسرحية التلفزيون.. وفرحانة باللي بيحصل فى العلمين

أعربت الفنانة بدرية طلبة عن سعادتها بما يحدث في مدينة العلمين الجديدة من فعاليات وتطوير، وذلك من خلال لقاء لها ببرنامج حد النجوم مع الإعلامية شريهان أبو الحسن عبر شاشة تلفزيون قناة أون.

تصريحات بدرية طلبة عن مهرجان العلمين

وقالت بدرية طلبة في تصريحاتها التي يرصدها موقع تحيا مصر: أنا فرحانة باللي بيحصل وواضح أن الشغل بيتعمل في وقت قياسي يعني احنا في تارجيت قدامنا عايزين نحققه أن احنا يبقى عندنا مكان للسياحة واحنا السياحة في بلدنا مفيش عليها أي غبار بس نصنفر الأماكن ونسلط الضوء عليها ونجملها لأن بلدنا حلوة تستاهل كل حاجة حلوة وتستاهل أن يجيلها الناس من جميع أنحاء العالم فعلشان يجوا يشوفوا الإنجاز دا أنا فخورة ببلدي بجد ومبسوطة أني جزء ولو بسيط منه من خلال مسرحية التلفزيون مع حسن الرداد وإيمي سمير غانم وسليمان عيد.

وعن دورها في مسرحية التلفزيون قالت بدرية طلبة: دوري دور بنت لعوب ومش ايه غيتهم أنهم يجيبوني في الأدوار دي بس ماشي، هي مسرحية لطيفة أوي دمها خفيف المجموعة اللي فيها مجموعة بسيطة ودا تاني عرض لينا يادوبك عملنا كام بروفة تذكير بس وبنعرض هنا في العلمين 3 أيام وجميع الأعمار كانت موجودة لأن احنا معندناش حاجة خارجة.

بدرية طلبة تحكي عن بداياتها الفنية

وفي اللقاء ذاته، تحدثت بدرية طلبة عن بداياتها الفنية فقالت: أنا كنت في اسكندرية والمسارح فيها كانت لا تعد والفرق الكبيرة كانت بتيجي من القاهرة زي فرقة سعيد صالح ويونس شلبي فاحنا بتوع اسكندرية بنروح نشوف لو عايزنا في أدوار صغيرة لحد ما عملت علامة مع الأستاذ شاكر خضير دا كان بيحبني جدا وأول مرة اشتغل معاه كان في تصبح على خير يا حبة عيني كانت عبد المنعم مدبولي وحسن يوسف وكان عندي وقتها 20 سنة، والدور اللي ربنا اكرمني بيه كنت مكان زميلة من اسكندرية وهي تعتبر أمي في التمثيل اسمها أستاذة عزيزة فاضل.

بدرية طلبة تنفعل على معجبة بسبب الحسد: قلوبكم سودة اتمنوا الخير لغيركم هينوبكم منه

بدرية طلبة تهنئ عادل إمام بعيد ميلاده: هرمنا الرابع ربنا يخليهولنا |خاص

تفاصيل مسرحية التلفزيون

ومن الجدير بالذكر أن مسرحية التلفزيون التي تم عرضها ضمن فعاليات مهرجان العلمين الجديدة في دورته الثانية، والتي تدور أحداثها حول شخصيتين وهما كروانة التي تجسدها الفنانة إيمي سمير غانم وحفظي الذي يلعبها الفنان حسن الرداد، وهما متزوجان يزورهما بابا نويل ليحقق لهما ما يتمنان، لكن تأتي هذه الزيارة بعد مرور ثلاثين عامًا، ولكنهما يجدان معه ضمن الهدايا تليفزيون سحري، فيدخلان ويتنقلان وسط قنواته في إطار من الكوميديا.

كما تضم قائمة أبطال مسرحية التلفزيون عدد كبير من النجوم والنجمات، منهم: حسن الرداد وإيمى سمير غانم، أوس أوس، محمود حافظ، بدرية طلبة، وسليمان عيد، وتأليف أحمد سعد، إبراهيم صابر، ومحمد خطاب، وغيرهم.