هايدي تطلب الخلع: معاملته اتغيرت معايا بعد سنين حب وطردني أنا والعيال

هايدي زوجة تبلغ من العمر 22 عاما، وقفت أمام محكمة الأسرة في الكيت كات طالبة الخلع من زوجها وتمكين من الشقة، بعد أن طردها من الشقة هي وأولادها وتعدى عليها بالضرب والإهانة وعدم قيامه بدفع مصروفات المنزل لهم أو أي أموال.

مسكته في السرير مع قريبته.. هالة لـ تحيا مصر: خلعته علشان خاين

زوجة تطلب الطلاق: هخلعه لو مطلقنيش كفاية ضرب وإهانة

طردني في نص الليل.. تهاني لـ تحيا مصر: بيضربني قدام بناتي اللي على وش جواز

بيجيب ستات في الشقة.. وفاء تطلب الخلع: بيضربني ويخوني ومش عارفة اتكلم

هايدي تطلب الخلع بعد ٥ سنين حب وجواز: طردني أنا والعيال

بداية الحديث أمام محكمة الأسرة، حيث جلست هايدي التي تبلغ من العمر 22 عاما تنتظر موعد جلستها في المحكمة، وسردت تفاصيل مأساتها مع زوجها قائلة «في بداية الجواز كان كويس جدا وكانت حياتنا كويسة ومفيهاش أي مشاكل بيني وبينه، وفجأة اتغير والخناقات بقت كل شوية وبقى بيتلكك على كل حاجة».

وتابعت هايدي لـ تحيا مصر قائلة «بقى بيضربني كل شوية ويتخانق معايا على الفاضي والمليان، وفي النهاية قالي أنه عايز يتجوز عليا رقم أننا متجوزين أنا وهو عن حب 3 سنين، وبقالنا 5 سنين متجوزين، أنا اتجوزته وأنا عمري 18 سنة ومعايا منه ولدين وكان في البداية بيحبهم جدا والدنيا كانت طبيعية بس مش فاهمة أيه اللي حصل».

هايدي: طردني من الشقة وقالي هتجوز على عفشك

وأكملت هايدي قائلة «بعد فترة من الخناقات والضرب والإهانة طردني بالعيال في نص الليل وقفل الشقة وقالي أنا هتجوز عليكي وأعلمك الأدب، وحماتي طبعا وقفت مع ابنها وقالتي هجوزه واخليه يتجوز عليكي وأخر ما زهقت جيت محكمة الأسرة أرفع قضية خلع وتمكين لأني مش عارفة أعمل معاه حاجة».

واستكملت هايدي في قصتها «أنا حاربت الدنيا كلها عشانه والله وفي الأخر بهدلني وطردني أنا والعيال وأنا قاعدة عند أهلي، كنت عايشة معاه ومقصرتش في حاجة بس للأسف طلع ندل ومطمرش فيه أي حاجة وبيسمع كلام مامته في كل حاجة، وماشي وراها في الجوازة التانية وفي النهاية طردني من البيت وقالي مش عايز أشوف وشك تاني وقالي أنا هتجوز فيها واخليها تلبس هدومك وأنتي بره»

هايدي: قالي هجيب واحدة تلبس هدومك

واختتمت هايدي قصتها مع زوجها قائلة «مبقتش عارفة أعمل أيه بدعي ربنا يخلصني منه ويعوضني ويعوض على شبابي وحياتي في اختياري الغلط حسبي الله ونعم الوكيل فيه هو ووالدته منهم لله لا هو عايز يصرف على عياله ولا سايبني أعيش في شقتي ولا حماتي سيباني أنا وأحفادها».