زوجة داخل محكمة الأسرة:«جوزي بيحسسني أني عدوته ولما بنده عليه مش بيرد عليا»
ADVERTISEMENT
"الناس بقوا يقولولي يلا ياللي جوزك مبيعبركيش وبيعاملنا أحسن منك" بتلك الكلمات روت زوجة لتحيا مصر من داخل محكمة الأسرة عن زوجها الذي يعاملها بفتور حتي أصبحت محط سخرية واستهزاء بين أسرتها وأقاربها.
جوزي من ساعة ما بقي مدير وهو شايف نفسه عليا
بدأت الزوجة حديثها لتحيا مصر :" أنا وجوزي متجوزين من 3 سنين وجوزي يبقي شغال في البورصة عندنا ولد عمره سنتين في بداية الجواز كان جوزي بيعاملني المعاملة الطبيعية اللي بين أي راجل ومراته لحد ما أترقى في شغله ومسك منصب إداري ومن ساعتها وهو اتغير معايا ومبقتش أعرف أكلمه ولا حتي بشوفه أنا وأبني ".
بيعاملني معاملة الخدامين وحتي العلاقة الزوجية مبقاش يطلبها
وتابعت الزوجة حديثها :" لو لسانه خاطب لساني يبقي بيطلب مني حاجة أعملهاله وبس غير كدة مبيعبرنيش يطلب أكل يطلب قهوة يطلب أغسله هدومه او اكويهاله واكني خدامة عنده لكن ميطلبش أن يبقي في أي لحظة تجمعنا سوا ولا حتي بيطلب العلاقة الزوجية بحجة أنه مشغول وهيصحي الصبح بدري للشغل واكتر حاجة بتوجعني منه لما يبقي في البيت ومش مستحمل عياط أبنه وبيزعقله عشان يسكت ويقوله " بطل زن ورايا شغل " والولد بيبقي نفسه يلعب معاه ويقعد في حضنه لكن مش مقابل منه أي حنية".
لما بندهله مش بيرد عليا وضحك عليا الناس
واختتمت الزوجة حديثها :" كل ده وأنا ساكتة ومستحملة لحد ما عمل في يوم عزومة كبيرة لأهله بمناسبة عيد ميلاد والدته لأنه بيحبها ومتعلق بيها جدا وفي اليوم ده شوفت جوزي وهو مبسوط وبيضحك مع الناس كلها إلا أنا وأبنه لدرجة أن في وسط الناس ندهتله عشان يساعدني في حاجة مردش عليا وكل أهله ضحكوا عليا وقالولي " هو ماله بيعاملك كدة ليه ده مبصش حتي في وشك !" اتكسفت جدا من كلامهم واتوجعت ولما معاملته الجافة دي زادت معايا أنا وأبني قررت أخلعه في المحكمة عشان مش أنا الست اللي تقبل تعيش مع راجل شايف نفسه عليها وبيقلل منها قدام الناس والخلع ده بالذات هيكسره قدام نفسه اللي فرحان بيها وطالع السما وأتمني أن ربنا يعوضني بعده خير ".
جوجل نيوز
تطبيق نبض
