" مراتي بتكلم واحد أصغر منها وبتقولي بيعرف يهتم بيا أكتر منك وهتجوزه " مأساة زوج داخل محكمة الأسرة

" مراتي بتحب الكلام الحلو زي عنيها ومبقيتش عارف أرضيها أزاي " بتلك الكلمات روي زوج داخل محكمة الاسرة لتحيا مصر عن زوجته التي تتبع كل من يهتم بها ويسمعها الكلمات اللينة كأحتياج أنثوي لديها مما جعلها تريد كسر زوجها بخيانته مع شاب أصغر منها سنا .

تحيا مصر 

متجوزين عن حب من 6 سنين ولسه مخلفناش 

بدأ الزوج حديثه لتحيا مصر :" أنا ومراتي متجوزين من 6 سنين أتجوزنا بعد قصة حب أستمرت 8 سنين و لسة مخلفناش لحد دلوقتي مراتي من أيام الخطوبة وهي مش بتشبع من كلام الحب كل مشاكلنا كانت لو أنشغلت عنها شوية أو تعبت وبطلت أهتم بيها غصب عني بس كنت بعرف أراضيها في الأخر لكن بعد الجواز كل حاجة أتغيرت المسؤولية زادت عليا وهي عدم الخلفة خلاها تحتاجني أكتر وتضايق من غيابي أكتر وأكتر ".

بتختبر حبي ليها طول الوقت بشكل يخنق 

وتابع الزوج حديثه :" مراتي لما تضايق من انشغالي عنها تفضل تدخلنا في قصص وتحطني في اختبارات عشان تشوف أنا لسه بحبها ولا لا وأنا بنسبالي الحب أفعال مش كلام لكن هي طبعها بيحب الكلام وبنسبالها هو ده مقياس الحب كانت تغيب عن البيت بالأيام عشان تشوف هتوحشني ولا لا وأوقات كانت تنزل من البيت من غير ما تقولي وتتأخر وتقفل تليفونها عشان تشوف أنا هخاف عليها ولا لا كل ده بنسبالي تصرفات أطفال ومراهقين لكن أنا عشان كنت مقدر قعدتها في البيت طول الوقت لوحدها فكنت مبرضاش أجي عليها وأزعلها ".

لقيت رسايل بينها وبين واحد أصغر منها وطلعت تمثلية عاملاها عليا 

وأختتم الزوج :" في مرة كنا أنا وهي متخانقين خناقة كبيرة  وفضلنا بالأيام مش بنتكلم لكن كنت ملاحظ في الوقت ده أنها بتمسك تليفونها كتير وبتضحك وتسهر عليه بالساعات وده أثار فضولي وأستنيت تسيبه من أيدها ومسكته أشوف هي بتكلم مين لقيت رسايل بينها وبين شخص يقربلها من عيلة والدها وهو أصغر منها في السن وبيتكلموا أكنهم صحاب وقريبين جدا من بعض وهي لما لقيتني ماسك تليفونها وبقولها أية ده ؟  قالتلي "مالك مستغرب لية ؟ ده قريبي وشخص محترم ولسانه حلو مش زيك قاعد بالايام مبتقوليش صباح الخير "  أديتها علقة موت علي كلامها ده  لحد ما قالتلي " خلاص أنا هفهمك كل حاجة " ولما فهمتني طلعت أن دي تمثلية هي عملاها عليا هي وقريبها وأنها كانت قاصدة تسيبلي التليفون وتقوم عشان أشوف الرسايل دي وهي تشوف انا بغير عليها ولا لا وبالتالي نتصالح أتصدمت من دماغها الصغيرة ورميت عليها يمين الطلاق ويشاء القدر أنها بعد الطلاق تحمل وتجيب ولد وتيجي ترفع عليا في المحكمة دعوي نفقة ".