عايدة غنيم: ابني عنده حرمان بيئي وفرط حركة.. وبصرف عليه من لايفات التيك توك

تحدثت الفنانة عايدة غنيم، عن الفيديو الذي نشرته عبر حسابها الشخصي بموقع تيك توك، وجهت خلاله رسالة لطليقها مطالبة إياه بمساعدتها في الإنفاق على نجلهم والمساهمة في دفع تكاليف علاجه، وتفاصيل انفصالها.

عايدة غنيم: كنت الجوازة رقم 2 في حياة طليقي

وقالت عايدة غنيم، في لقائها مع الإعلامية إنجي هشام، في برنامج "المنسي"، المذاع عبر شاشة قناة "هي" والذى رصده موقع تحيا مصر: أنا عملت فيديو وقولت فيه بوجه رسالة لناس عارفة نفسها، يعني مكنتش بوجه للناس بشكل عام، وقصدت أعمل الفيديو علشان أقطع كل الألسنة واللي عنده حاجة غير اللي بقوله يقولها.

وتابعت: أنا كنت الجوازة رقم 2 في حياة طليقي، ولكن أنا مش سبب انفصاله عن زوجته الأولى، واتعرفت فيه 3 شهور واتجوزنا وقعدنا 4 سنين متجوزين، وأنا مخدتش إجراءات قانونية حتى من قبل ما نطلق لأني مش عايزة حد يقول لابني لما يكبر مامتك دخلت باباك المحكمة.

عايدة غنيم: قعدت ٣ شهور متعلقة في حياة طليقي ومرفعتش قضية خلع

وأضافت: أنا لما طلبت الطلاق قعدت سنة و3 شهور متعلقة لأنه مكنش عايز يطلقني، ومرفعتش قضية خلع مع أن ناس كتير نصحوني أرفع خلع، وأنا ربنا بيرزقني علشان خاطر ابني، وابني متأخر في الكلام وعنده حاجة اسمها حرمان بيئي، وبياخد تعديل سلوك وجلسات تنمية مهارات وتخاطب وتكامل حسي، وهو عنده فرط حركة وبرمنه جومباز وسباحة، وده مش رفاهية، وأنا مفيش حد جنبي ولا بيحضر معايا جلسات ابني.

عايدة غنيم: أشرف زكي ساعدني في علاج ابني.. وبصرف عليه من لايفات التيك توك

وكشفت الفنانة عايدة غنيم، عن مساعدة الدكتور أشرف زكي نقيب المهن التمثيلية، في علاج نجلها، بجانب الحديث عن تفاصيل دخولها عالم التيك توك، والتي أوضحت أنها تعتمد عليه اعتماد كلي في الإنفاق من أرباحه على نجلها، مضيفة: أنا عشمي دايمًا في ربنا، وإحنا كلنا أسباب، فأنا كنت بلوم على النقابة بتاعتي مش زملائي لأن مافيش حاجة في إيديهم يعملوها، ولكن مؤخرًا اكتشفت أن في نظام شلالية في السوق، ولكن الدكتور أشرف أخد موقف أنا بحييه عليه.

عايدة غنيم: بصرف على ابني من لايفات التيك توك 

وتابعت عايدة غنيم: دكتور أشرف زكي إنسان قبل ما يبقى فنان ونقيب، وهو وقف معايا في مواقف كتير ومنها علاج ابني، وأنا ابني أهم حاجة في حياتي، وجمايله أنا شايلاها، وآخر حاجة كان في تحليل لـ ابني سعره 50 ألف جنيه، وكلمت أشرف زكي وعمل المستحيل وعملت التحليل بالتأمين الصحي.

عايدة غنيم: من يوم ما انفصلت محدش بعت جنية لابني.. وعلاجه بيتكلف 150 دولار

أما عن دخولها عالم السوشيال ميديا والتيك توك، فعلقت عايدة غنيم: أنا حياتي كلها دلوقتي ابني وعلاجه ومبنامش، فمعنديش وقت أدخل شلة، وأنا عايشة على السوشيال ميديا والتيك توك وبفتح لايفات، والتيك توك بالنسبة ليا بقى هو اللي أنا معتمدة عليه في مصاريفي ومصاريف ابني علشان معنديش شغل، والسوشيال ميديا اللي أنا أقدر أصرف من خلالها، وهي أه مبتجبش ليا المبالغ اللي الناس متخيلاه علشان في حاجات إحنا كفنانيين منقدرش نعملها علشان نحافظ على شكلنا، ولكن المهم أنها بتساعد بجزء كبير.

وأضافت: والناس بتنتقد على أساس إيه؟ ما أنت لو في وضعي هتعمل كده أو ممكن تعمل حاجات تانية أنا مرضاش أعملها.