بدرية طلبة: الزعيم حقه يرتاح وياسمين عبد العزيز بتخدم عليا

فجرت الفنانة المصرية بدرية طلبة عدة تصريحات خلال لقاء تليفزيوني، وذلك حول عدد من النجوم على رأسهم النجمة ياسمين عبد العزيز والزعيم عادل إمام.

بدرية طلبة تتحدث عن علاقتها بالنجمة ياسمين عبد العزيز 

وقالت بدرية طلبة في تصريحات يرصدها تحيا مصر: نجمة بحجم ياسمين لما بمثل معاها وبحترم وقفتها قدامي أوي وأكون خايفة أقول حاجة، تقولي لي في إيه ما تقولي وتضربني، وتقول لي يا بت ما تقولي ساكتة ليه وأنا بكون محرجة، وبتقف تخدم عليا وتفرشي لي وأنا أرمي علشان كده ببدع معاها.

وتابعت: بتعمل ده مع كل اللي بتحبهم أو اللي بتتفائل بوجودهم في العمل أو حابة وجودهم معاها، زي أنا وإيمان السيد أو حسن عبد الفتاح، فدايما إحنا معاها في تلات أرباع شغلها، فمعنى كده أن البني آدمة دي بتجيب الناس اللي بيعلموا حاجة كويسة، علشان يقفوا قصادها علشان هي واثقة من نفسها، وهي باسمها ده كله مش عاوزاني أقل منها بتكون عاوزاني أعلى منها.

واستطردت: اشتغلت مع عمالقة، زي سمير غانم ومحمد نجم وسعيد صالح ويونس شلبي، ربنا يرحمهم، واتعلمت من كل واحد شوية، زي ما بتدخل جنينة وبتاخد وردة من كل نوع، وتعمل في النهاية بوكيه حلو، وكل واحد له مدرسة.

وعن سمير غانم، قالت: لما يطلع على المسرح بتروح معاه في حتت كتير، حد جميل وبيلعب ويرجع فاهم بيعمل إيه ويمتع الناس إزاي.

وكشفت سبب الكيمياء بينها وبين النجوم قائلة: راجع للنجم روحه حلوة ولا لأ، وكميتنا حلوة ولا لأ، لو حاببني ووصلي الإحساس ده هقدم أحلى ما عندي، لأن أنا زي الطفلة في شغلي وفي حياتي اللي يطبطب عليا ويقول لي كلمة حلوة بياخد روحي كلها.

رأي بدرية طلبة في اختفاء الزعيم عن الساحة

وعن الزعيم: حقه يرتاح وحق ولاده يحافظوا عليه، وبحترمهم جدًا لأن هما محافظين عليه في الوقت اللي لازم الناس ما تشوفهوش فيه، لأن إحنا وقفنا عند الأستاذ والزعيم، لازم يفضل في نظرنا في الصورة دي.

فيما قالت عن محمد إمام: كل اللي أقدر أقوله إنه متربي والتربية بتشمل كل حاجة في حياته.

هذا وقالت في برنامج نفسنة: يعني إيه سينجل ومش سينجل إحنا عايزين نلم الدنيا، ليه الطلاق وكل واحد يروح لحاله وتفرح؟ بنلاقيه على فيسبوك مكتوب إنها متزوجة وفرحانة، وتاني يوم تقول باركولي أنا سينجل، نباركلك على إيه؟ هو خراب البيوت بالساهل؟!.

صغرت 20 سنة.. حقيقة إجراء بدرية طلبة لعملية تجميل |فيديو

بدرية طلبة تعلن تعرضها لحادث سير: مكنش ينفع أنام في السرير وأسيب شغلي

وتابعت بدرية طلبة: عايزين نلم الدنيا وحالات الطلاق زادت أوي يا جماعة، وبتلاقي نفسك محتاسة في كل شئون حياتك، لكن لو الإنسان اللي في حياتك ميؤوس منه فأنا معاكي إنك تطلقي، أبغض الحلال عند الله الطلاق، لكن لو الحاجة تتصلح صلحيها يا بنتي وخلصي.

وأضافت: كلمة عانس تقيلة أوي، وبرا مصر الكلمة دي عندهم عيب، وأنا بقولهم دي بنهزر عندنا بيها، ولكن هي كلمة مؤلمة نفسيًا.