أشرف عبد الغفور عن ابنته ريهام: مستعجلتش على الشهرة.. وبتختار بعناية شديدة

تحدث الفنان أشرف عبد الغفور عن ابنته الفنانة ريهام عبد الغفور، ورأيه في موهبتها، وذلك خلال لقائه اليوم ببرنامج واحد من الناس مع الإعلامي عمرو الليثي.

تحيا مصر يرصد تفاصيل تصريحات أشرف عبد الغفور

أشرف عبد الغفور وابنته ريهام

وقال عبد الغفور: أنا نادرًا من أول ما ريهام اشتغلت ومفيش عمل مسقفتلهاش فيه، أنا بتكلم كمشاهد بتابع ممثلة من أول ما ابتدت لغاية دلوقتي مش كأب، كم النضج اللي فيها من أول ما ابتدت.

وتابع: واحنا طول عمرنا عندنا مدرسة اسمها مدرسة مرحلة الانتشار، هي رفضت من البداية هذه النظرية من تاني عمل، وأول عمل عملته مع الأستاذ محمد فاضل، تاني عمل لنفس المؤلف مجدي صابر، وبعد كدا اتعرض عليها دور شبيه باللي عملته رفضت.

رأي أشرف عبد الغفور في ابنته ريهام

واضاف: ودي كانت واقعة يندهش لها أنها كانت ممثلة لسه بتقول باسم الله الرحمن الرحيم وتقوم تعمل كدا، واستمرت على هذا الدرب حتى الآن، ولا بتكرر من نفسها ولا تعجلت مال ولا شهرة.

واستطرد: وهي بتختار بدقة وبعناية شديدة جدًا، وبترفض عشر أضعاف اللي بتقدمه، ومش بقرأ معاها شغلها المعروض عليها إلا إذا هي طلبت.

ريهام عبد الغفور: والدي عرفني أن الواحد مش هيسيب غير السيرة

وسبق وأن تطرفت الفنانة ريهام عبد الغفور بحديثها عن والدها خلال لقائ تلفزيوني سابق لها، فقالت: “أسسني صح، وفهمني الحجات اللي أنا مؤمنة بيها وإن الواحد مش هيسيب غير سيرة، وليه تأثير عليا فنيا وانسانيا”.

أما عن أصدقائها، فأوضحت ريهام عبد الغفور: “صحابي خارج الوسط الفني وحنان مطاوع من الوسط الفني ومنى زكي ومنة شلبي وبسمة وياسمين عبد العزيز، وحنان الأقرب، وخارج الوسط هما صحابي الأكتر منهم رانيا السيد وبوسي صديقة عمري، عندي أصحاب كتيرة جدا وأنا من الناس المحظوظة اللي عندي أصحاب كتير”.

وكان قد اجتمع الفنان أشرف عبد الغفور مع ابنته ريهام عبد الغفور  لأول مرة بعد 15 سنة في عمل فني من خلال مسلسل رشيد، والذي عرض في السباق الرمضاني المنقضي، وحقق نجاحًا كبيرًا.