زوجة للقاضي: جوزي بيصحيني في عز الفجر العب معاه كوتشينة بعد ما ساب شغله وبقي عنده فراغ

جوزي شخصيته اتغيرت بعد ما ساب شغله ومبقيتش طايقة العيشة معاه.. بتلك الكلمات روت زوجة لـ تحيا مصر من داخل محكمة الأسرة عن زوجها والتغير الكلي الذي شعرت به معه بعد أن ترك عمله وأصبح يجلس في المنزل طوال الوقت وهي بالرغم من حبها الشديد له إلا أنها سئمت من تلبية طلباته الغير مهمة والذي يطلبها بإلحاح لتسديد أوقات فراغه .

جوزي كان شغال مهندش وساب شغله 

بدأت الزوجة حديثها لتحيا مصر :"جوزي كان شغال مهندس مدني وساب شغله بسبب مشاكل في الشركة اللي كان شغال فيها والموضوع كان صعب جدًا عليه ودخل في اكتئاب شهور كتيرة مكنش بياكل ولا بيشرب ولا بيشوف حد لأنه من النوع اللي بيحب شغله جدا وناجح فيه وتعب عشان يوصله وفي الآخر لقي أن كل ده ضاع واترمي في الأرض ده غير أننا عندنا طفلين وأنا برعاهم طول الوقت ومش عارفين بعد الأزمة اللي حصلت دي هنصرف عليهم أزاي ؟".

جوزي شخصيته اتغيرت بعد ما ساب الشغل وبقي واحد تاني 

وتابعت الحديث :" بعد ما جوزي ساب الشغل حاجات كتير في شخصيته اتغيرت وخصوصاً تعامله معايا ومع اولادي لأنه في الأول مكنش بيدينا اي نوع من انواع الأهتمام وبعد ما قعد في البيت بقي مركز معانا بشكل مبالغ فيه يعني مثلا لو نزلت اشتري طلبات يبدأ يعملي تحقيق ولو حد من عيالي مسك التليفون شوية يفضل قاعد جنبه ويشوف بيكلموا مين وبيعملوا اية علي التليفون ده غير أنه بقي يتحكم في طريقة أهتمامي بالبيت وهو اللي بيقولي انضف الشقة امتي وانضفها أزاي واطبخ اية ومطبخش اية وتبقي ليلتي مش معدية لو فكرت اسيبه ساعتين بس اروح ازور فيهم أهلي وطبعا كل ده مكنش موجود لما كان بيشتغل كنت بحس بحرية كاملة أنا وعيالي ".

مروة تطلب الخلع: جوزي بيستخبي فى الحمام وسايبنى اتصرف مع الرجالة اللى مديون ليهم

«بيشوفني ميتة في الحلم».. مأساة زوجة: جوزي كل يوم بيحلم أني بموت وبيصحى يودعني وهو بيبكي

بيصحيني في عز الفجر الاعبه كوتشينه  

واختتمت الزوجة حديثها :" جوزي في الفترة الأخيرة بقي بيسهر بليل كتير وعايزني افضل سهرانة جنبه واسيب مسؤولية العيال اللي ورايا وبصحالهم من 6 الصبح لكن علي ما بقدر كنت بسهر معاه ليلة ولا ليلتين في الأسبوع عشان ميزعلش لكن الموضوع زاد عن حده وبقي بيصحيني كل يوم الساعة 3 و 4 الفجر ويقولي " اصحي اقعدي معايا ونلعب كوتشينة عشان حاسس بملل وزهق تعبوني " ومرة يصحيني عشان اعمله عصير جوافة الفجر ومرة تانية يصحيني ادورله علي قناة علي التليفزيون مش لاقيها وبيحب يتفرج عليها كل ده حاولت استحمله كتير لكن تعبت وخصوصاً أن العيال كمان طلباتهم كتير ومبقيتش قادرة علي كل ده لوحدي وهو ياريت بيصرف علينا زي الأول ده أبويا وأمي هما اللي فاتحينلنا البيت رفعت عليه دعوي خلع عشان اخلص منه وهو يبقي يشوفله خدامة تفضل قاعدة جنبه طول الوقت ومبتنامش ".