«بيشوفني ميتة في الحلم».. مأساة زوجة: جوزي كل يوم بيحلم أني بموت وبيصحى يودعني وهو بيبكي

جوزي بيصدق الأحلام أكتر من الواقع .. بتلك الكلمات روت زوجة لتحيا مصر من داخل محكمة الأسرة  عن زوجها ذو العقل الغير ناضج والذي يؤمن دائماً بالخرافات والأحلام ويظن أنها حقيقة وستحدث في أرض الواقع يوماً ما ويتهيأ لها على هذا الأساس مما جعل زوجته تشعر بالريبة منه وتقرر الإنفصال عنه برفع عليه دعوى خلع بمحكمة الأسرة .

جوزي عقله صغير وبعامله زي الأطفال 

بدأت الزوجة حديثها لـ تحيا مصر :" أنا وجوزي متجوزين من 5 سنين وعندنا بنت اتجوزنا بشكل تقليدي وسريع جدا ومكناش لحقنا نعرف بعض قبل الجواز لكن بعد عشرتي معاه ولما اتقفل علينا باب واحد اكتشفت طباع غريبة فيه وأن عقله عقل أطفال ويمكن أنا ناضجة عنه بكتير لأنه كان بيحب يعمل حاجات غريبة زي أنه ينام كل يوم في حضني ولازم أفضل أطبطب عليه بالساعات ولازم وهو مروح من الشغل كل يوم يبقي شاري معاه كيس حلويات كتير ويفضل ياكل فيها زي العيال وكان أوقات لما اتعصب عليه وانفعل غصب عني من تصرفاته يفضل يبكي ويطلب مني السماح لكن كل ده كنت بستحمله وبقول لنفسي كفاية أنه مش بيأذيني ولا بيضرني ".

جوزي بيؤمن بالخرافات وبيخاف من أفلام الرعب 

وتابعت الزوجة حديثها :" جوزي من صغر عقله بيخاف زي العيال من أفلام الرعب ولو شافها أو حتي شاف مشهد واحد منها بيبقي متخيل أن اللي هو شافه في الفيلم هيظهرله في الحقيقة ده غير أنه مؤمن بجميع الخرافات والقصص والحواديت القديمة والأساطير المؤلفة وبيفضل يحكيلي فيها بالساعات ومهما بفهمه أن كل ده وهم وخيال مش بيصدقني وبيفضل مقتنع باللي في دماغه لدرجة أنها وصلت بيه أنه يؤمن كمان بالأبراج ويصحي بدري مخصوص عشان يشتري جورنال ويعرف منه أية اللي هيحصل في يومه حسب تاريخه وبرجه بقيت بخجل من عقلية جوزي قدام الناس وكل ده كنت مستحملة عشان خاطر بنتي وبس ".

كل يوم يحلم أني بموت بطريقة مختلفة ويصحي يودعني 

واختتمت الزوجة :" جوزي في الفترة الأخيرة كل يوم يصحي من النوم وهو مفزوع ويفضل حاضنني وهو بيبكي ولما أسأله أية اللي حصل ؟ ألاقيه بيقولي أنه حلم بيا وأنا بموت قصاد عنيه وأن الحلم كان صعب ومش عارف ينساه وفضل على الحال ده أكتر من ليلة مرة يقولي حلمت أنك بتموتي في حادثة ومرة يقولي حلمت أنك بتموتي بسكتة قلبية ومرة يقولي حلمت انك بتقعي من البلكونة من الدور السابع ويفضل يودع فيا ويقولي " الدنيا هتبقي وحشة من غيرك متسيبينيش أنا محتاجلك " وكلامه بيخليني في حالة ذهول لحد ما اتأكدت أنه مش سوى نفسياً وأن الحياة معاه في بيت واحد بقيت صعبة تكمل وعشان كده رفعت عليه دعوى خلع في محكمة الأسرة قبل ما اتجنن أنا كمان منه وافقد عقلي ".