أيمن أمام محكمة الأسرة :مراتي قطعت شرايين أيديها عشان قولتلها ربنا ياخدك

" مراتي محسساني أني متجوز أهلها مش متجوزها هي " بتلك الكلمات روي زوج لتحيا مصر من امام محكمة الأسرة بزنانيري عن زوجته التي تعامله معاملة الضعفاء وتقلل من شانه في كل شئ وخاصة أمام الناس وأمام أسرتها .

زوج أمام محكمة الأسرة:«أتجوزت أتنين مجانين بيضربوا بعض بالشبشب وطلقتهم في وقت واحد»

رحاب تستغيث بـ محكمة الأسرة .. جوزى ولع فيا وأنا نايمة عشان حلم أنى بخونه

أهلي كانوا بيبقولولي أستحملها دي مجنونة 

بدأ أيمن حديثه لتحيا مصر :" مشوفتش يوم واحد عدل مع مراتي طول الوقت كانت بتحسسني أني مش راجل قدام الناس ولا قدام أهلها ولا أولادي وأنا في الأصل راجل صعيدي وملتزم دينيا جدا والمفروض أن الست أهلها هما اللي بيبقوا بيصبروها علي العيشة لو جوزها تاعبها لكن أنا الوضع معايا كان معكوس وأهلي هما اللي كانوا بيصبروني علي العيشة معاها ويقولولي " دي مجنونة وأستحملها عشان عيالك " وهنا كنت بدأت اتأكدت أني بقيت ضعيف ومليش قيمة عشان مجبر أسكتلها وأعديلها لحد ما قررت في يوم أتخلص من العيشة دي ووقتها طلقتها وبقيت أنا من طريق وهي من طريق " .

كل أسرار بيتي كانت بتروح تحكيها لأهلها 

وتابع أيمن :" من اول يوم جواز ومراتي بتحكي كل حياتنا بتفاصيلها لأهلها وخصوصا والدتها لو أشتريت قميص جديد ولا جيبت لمراتي أكلة جديدة تطبخها تروح تحكي لأهلها ولما كنت أتخانق معاها وأقولها أن الكلام ده مينفعش وأن بيتنا له خصوصية كانت تعمل نفسها مش سامعة وتمشي الدنيا برضه علي مزاجها في الاخر ".

قطعت شرايين أيديها عشان قولتلها كلمة زعلتها   

وأختتم : " في مرة ولادي طلبوا من أمهم أنهم يباتوا عند جدتهم واللي هي تبقي والدتي وحماة مراتي والكلام ده معجبش مراتي وقالتلي " لا العيال مش هيباتوا عند أمك عشان أنا مبحبهاش " روحت أنا قولتلها " هو أنتي كل حاجة العيال يبقي نفسهم فيها تقوليلهم لا روحي يا شيخة ربنا ياخدك " وهي طبعا بعد الكلام ده قالتلي " لو وديتهم عند امك أنا هموتلك نفسي " وانا مديتهاش أهمية وسيبتها تعمل اللي تعمله علي أساس أنها بتقول كدة عشان تضايقني وخلاص لكن أتفاجأت أنها دخلت المطبخ بجد ومسكت السكينة وقطعت شرايين ايديها الأتنين ومن وقتها وأنا أتأكدت أني خلاص مش هطيق أعيش معاها تاني وسيبتلها العيال والشقة وكل حاجة مقابل اني أخلص منها ".