نشوى مصطفى: الثانوية العامة مش نهاية المطاف ومعظم خريجي هندسة مش شغالين بيها

خرجت الفنانة نشوى مصطفى لتقديم رسالة لأهالي طلاب الثانوية العامة وذلك بعد ظهور النتيجة ودخولهم في مرحلة كتابة التنسيق، مشيرة إلى أن الثانوية العامة ليست نهاية المطاف، معقبة: انتو بتتعبوهم نفسيا ولو اي حد حصله حاجة بنقعد نعيط جنبه.

نشوى مصطفى لأهالي طلاب الثانوية العامة: كتر خيركم لتعبكم بس براحة على ولادكم 

قالت نشوى مصطفى في مداخلة هاتفية مع الإعلامي شريف مدكور ورصدها موقع تحيا مصر: كتر خيركم لتعبكم بس بالراحة شوية على نفسكم وولادكم لأن الثانوية العامة مش نهاية الدنيا، ومش مجموع الثانوية أساس النجاح في الدنيا والأمور كلها بقدر الله.. وربنا ممكن يقدر الأفضل فالبراحة على ولادنا لأني بزعل لما ألاقي أولاد منهارين أو أهاليهم عاملين لهم رعب، وأنتم كده بتتعبوهم نفسيا ولو أي حد حصل له حاجة هنقعد نعيط جمبه والأساس في الحياة تربي ابنك على أنه لو حصل له ظرف في حياته يقف ويقوم تاني ويشد حيله لأنه هياخد درس ويتعلم.

وأضافت: تعبكم كأهالي في ميزان حسناتكم لكن لازم نربي ولادنا أنهم يقعوا ويقوموا أقوى.. والثانوية العامة مش نهاية المطاف والمشوار كبير ومحتاج مجهود كبير.

نشوى مصطفى: ابني صحابه كلهم مهندسين بس بيشتغلوا حاجات تانية 

واستكملت نشوى مصطفى حديثها عن الثانوية العامة، قائلة: أنا ابني 30 سنة معظم صحابه حولوا مسارهم لأن معظمهم كانوا خريجين هندسة، وكل ما أقابل حد أقول له عامل إيه في شغلك يقول لي لاء يا طنط أنا بقيت اشتغل كذا.. فكلهم دخلوا هندسة علشان المجموع أو علشان يرضوا بابا وماما.

واختتمت: أنا جبت 73% ومكانتش بذاكر أوي وكنت علمي علوم وأبويا وأمي كانوا عاوزين يدخلوني طب ولكن دخلت تجارة وما اشتغلتش الأربع سنين، وبعتبرهم عطلوا مسيرتي لأن مكانش هو ده اللي عاوزة أدخله.

السيارة ادمرت بالكامل.. اعرف الحالة الصحية للفنانة نشوى مصطفى بعد تعرضها لحادث

آخر أعمال نشوى مصطفى 

وكانت آخر أعمال نشوى مصطفى مشاركتها في مسلسل امبراطورية ميم والذي شهد على عودتها إلى الدراما بعد غياب دام لسنوات عديدة، وشاركت به إلى جانب كلا من النجوم خالد النبوي وحلا شحة ونور النبوي ونور ايهاب ومايان السيد وعدد من النجوم الشباب والأطفال والوجوه الجديدة، وعرض العمل ضمن سباق مسلسلات رمضان 2024 على إحدى شاشات القنوات المتحدة للخدمات الإعلامية.