أسما شريف منير: لما أحب مش هقول عشان دا ميخصش حد.. وطول الوقت عندي مشاكل مع أبويا بسبب أخباري

استنكرت المذيعة أسما شريف منير خبر يفيد بدخولها في علاقة عاطفية جديدة، بعد ظهورها بالمايوه، وذلك من خلال منشور عبر حسابها الشخصي على موقع تبادل الصور والفيديوهات إنستجرام.

أسما شريف منير تستنكر خبر دخولها في قصة حب

وكتبت أسما شريف منير في منشورها الذي يرصده موقع تحيا مصر: طيب ده خبر اتبعتلي لسه شايفاه محتاجة اتكلم عنه عشان بس أفهم الناس حاجة، أولاً أنا مظهرتش لا بمايوه ولا أي حاجة، لأني ببساطة مسفرتش اصلاً، أنا مسحولة في شغلي ولما سافرت في العيد ما نزلتش صورة بالميوه، بنقي الصور اللي ينفع تنزل ولا في أي صورة دايماً بحاول اخبي بأيدي نفسي حتي لما بلبس مايوه مش بنزل صور بيه فهما قرروا أنهم على حسابي يثيروا الجدل ويرجعوا الناس يقولوا أني بحب الترند وبثير أم الجدل، ولما كتبت أني لقيت اللي بدور عليه كان قصدي نفسي، أني لقيت نفسي، مش حب جديد لما ارتبط هقول لما احب مش هقول عشان ده میخصش حد.

أسما شريف منير: طول الوقت عندي مشاكل مع أبويا بسبب أخباري المثيرة

وتابعت أسما شريف منير: طول الوقت عندي مشاكل مع أبويا بسبب الأخبار البشعة دي اللي عايزين يصوروا للناس بيها أني صايعة ومنيلة الدنيا والحقيقة أني مطحونة في شغلي وفي حالي، وكل خبر نزل عني كان حقيقته غير اللي الصحف صورته عني، من موضوع البول لـ رأيي في شخص مهم، لـ حلق شعري، أي حاجة بيعمله منها أخبار مثيرة ومش مهم الشخص ده حقيقة حياته ايه عنده أولاد عنده أب محترم ميستحملش الكلام اللي الناس بتقوله، والناس على طول تشتم وتدعي العفة وتطلعك أوحش شخص في الكون وتصدق أخبار كدابة.

واضافت أسما شريف منير: أنا مش مسامحة أي حد كتب عني خبر كاذب أو استغلني في نشر خبر للبلبلة وده هنعرف ناتجته قدام ربنا لما نقف قدام بعض وربنا يجيب حقي منهم كلهم، أنا عارفة أنا مين وجوايا ايه ومش بيفرق معايا الناس اللي يقول يقول واللي يشتم يشتم واللي يصدق يصدق أنا اللي بيهمني بس بنتي وابويا غير كده محدش بيفرق معايا.

قاصدة البسه.. أسما شريف منير ترد على انتقادات ارتدائها تيشرت كوكاكولا

أسما شريف منير: متصدقوش كل حاجة بتتنشر

واختتمت أسما شريف منير منشورها: لأن الناس مش بيعجبها أي حاجة وبيفتكروا أنهم لما بيشتموا أو يتنمروا أو يغتابه ربنا هيعديها، اهي كلها حسنات بيدهاني، أنا بس حبيت أقول أن حقيقي شيء مؤسف أن حد يكتب خبر زي ده عشان فاكر أن ده نجاح ده مش نجاح ده تجریح وقرب فضايح أنا عارفة أني مش هغير الكون بالپوست ده بس على الأقل يمكن حد يفهم ازاي الناس اللي تحت الاضواء الناس ببساطة ممكن يشوهه سمعتهم، يمكن تفهموا انكم متصدقوش كل حاجة بتتنشر، يمكن حد يفهم ازاي بيتم استغلال الناس المعروفه بشكل بشع زي ده... ربنا كبير.