صحي لقى عنده محفظتين كاش فيهم 2 مليون جنيه.. قصة رضا من الغربية ولا الخيال| فيديو
![رضا ضحية الغربية]( /UploadCache/libfiles/44/0/600x338o/776.jpg)
ADVERTISEMENT
قصة رضا من قرية ميت حبيب من سمنود الغربية، تضمنت العديد من التفاصيل والكواليس، حيث استيقظ من نومه في الغربية وجد نفسه متورط في قية في المحكمة الاقتصادية لأنه اكتشف أن في 3 خطوط مكتوبين باسمه وهو مايعرفش عنهم حاجة، وجات له قضية بسبب خط من الخطوط التلاتة.
رضا من الغربية: صحيت لقيت نفسي متهم في أسيوط
قال رضا من محافظة الغربية لـ موقع تحيا مصر، أنا بشتغل موظف في شركة المياه وفي شهر رمضان جات لي ورقة من مركز سمنود إني عندي قضية في المحكمة الاقتصادية في أسيوط وكنا داخلين على العيد معرفناش نتواصل مع محامي، وبعد العيد قاله اعملي توكيل وهجيب ورق القضية، وبعدها قاله في رقم باسم أخوك وهو ناصب بيه وبعت لي الرقم وروحت الفرع وسألت أنا عندي كام خط، وقالت لي أنت ليك 3 خطوط منهم خط طالع من هنا، قولت لها طيب الخطين قالت لي مقدرش أقولك طالعين منين، وروحت فرع تاني وأديتهم البطاقة قالولي نفس الكلام والتلاتة طالعين من المحلة، ولما سألتها على الخطين استغربت من كلامي.
رضا: لقيت نفسي عندي خطين وعليهم 2 مليون جنيه
تابع رضا في حديثه قائلا: عملت كذا شكوى في خدمة العملاء، والمحامي ساعتها قال في رقم باسم أخوك ناصب على حد في 50 ألف جنيه ولما جبت كشف حساب لقيت الرقم عليه 2 مليون و50 ألف جنيه، أنا دلوقتي مقوم محامي وبدفع له فلوس وأنا ماليش دعوة بحاجة ومعنديش غير خطي بس اللي اعرفه ومعنديش حاجة تاني وحرام كدة ولسه في ناس هتشتكي تاني لأن الرقم داخله مبالغ ضخمة وبتتحول لأرقام تانية، وفي واحدة اتصلنا بيها قالت أنا خسرانة 800 ألف جنيه وبالنسبة لي أنا معنديش حل لكن أنت روح اشتكي.
رضا: ذنبي إيه في إني ادخل في قصة وقضية مش بتاعتي
وأكمل رضا من محافظة الغربية، دورت على القضية وعرفت كل حاجة عنها وأنا ماليش ذنب في القصة دي الأرقام دي سحبت مبالغ ب 2 مليون جنيه و200 ألف والتحويلات شغالة لأرقام تانية وأنا معرفش حاجة عن الأرقام دي، ولا اعرف هي طلعت منين وفي واحد من فودافون كاش قالي هخليك تستلم كشف حساب بالرقم بتاعك أنت وروحت فعلا لقيت الطلب واستلمت كشف الحساب وخدمة العملاء عملت لي حظر وقبلها قالولي مش غلطتك دي غلطة موظف، وأنا ذنبي إيه في اللي بيحصل معايا ده.