قبل وفاته.. تامر ضيائي يكشف عن وصيته: صلاة الجنازة أهم من العزاء.. وطلعوا لي صدقة جارية

كشف الفنان الراحل تامر ضيائي عن وصيته قبل وفاته والتي أوضح من خلالها الأشياء التي يرغب أن تحدث بعد وفاته والأشياء التي لا يرغب فيها أهمها التصدق على روحه وصلاة الجنازة، وجاء ذلك بعدما تعرض لوعكة صحية وأكتشف أنها كانت بداية جلطة.

قبل وفاته.. تامر ضيائي يكتب وصيته

نشر الفنان الراحل تامر ضيائي وصيته قبل وفاته في شهر مايو الماضي في منشور له عبر حسابه الرسمي بموقع التواصل الاجتماعي الفيس بوك، رصده لكم موقع تحيا مصر، وقال: “بوست وصية ده هيفضل باين علي صفحتي لحد ما أموت”.

وأضاف تامر ضيائي موضحًا سبب كتابته الوصية قبل وفاته، وعلق قائلًا: "الحقيقة اللي كلنا عارفينها ومتأكدين منها إننا كلنا ربنا كتب لنا إننا نموت فى ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة، ووقتها طبعًا مش هعرف أقولها لحد".

وصية تامر ضيائي قبل وفاته

• صلاة الجنازة أهم من العزاء وهي اللي كل ما العدد زاد كل ما ثوابي ما كان أكتر، فأرجوكم تصلوا عليا.
• مش شرط تيجي العزاء وياريت لو اتعمل في البيت أو مكان بسيط بفلوسه تطلعوا لي صدقة جارية أفضل.
• من فضلكم لم يثبت أو يتفق عليه عمل خاتمة قرآن للمتوفى إنها هتوصل له بس مثبت إن الدعاء والصدقة بيوصلوا للميت
• فرجاء دي بالذات بلاش وأدعوا لي الوقت اللي هتقرأوا فيه جزء فضوا نفسكم وأقعدوا أدعوا فيه.
• بلاش صدقة جارية تقليدية وسهلة ومش مستفاد بها يعنى المصاحف كتير في مصر أوى وكل بيت فيه كتير.
• ممكن نحط الفلوس في جامع بيتبني أو كرسي متحرك في مستشفى يستفادوا به المرضى.
• أو دخول مياه لبيت غلابة أو بناء سقف لبيت فقراء حاجات ناس تستفيد بها لمدة طويلة.

عاجل.. وفاة الفنان تامر ضيائي بعد صراع مع المرض وإصابته بجلطة

عاجل.. وفاة السيناريست شريف بدر الدين مؤلف مسلسل مفترق طرق

• دى نقطة مهمة أوي بالنسبة ليا .. محدش يقول لحد بتعيط عليه ليه، ومتعيطش عشان هو بيتعذب.
• الكلام ده غلط، سيبوهم يعيطوا لحد ما يطلعوا كل الشعور اللى عندهم ومفيش حاجة بتقول إن العياط معناه عدم رضا بقضاء ربنا.
• "وأبيضت عيناه من الحزن فهو كظيم"، وأهم حاجة تانى هي الدعاء وبس والصدقة.
• من فضلكم تكثفوا الدعاء وقت نزول القبر وتتصدقوا بأى حاجة بنية إن ربنا يجعل قبري روضة من رياض الجنة ويثبتني عند السؤال
• لأن ده أهم وقت ليا وياريت كمان بعد ما تدفنونى تقعدوا معايا شوية ومتستعجلوش تمشوا عشان تونسوني في ليلة زي دي.
• الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هونوه على نفسكم بالدعاء ليا
• عشان أبقى في سعادة لحد ما أقابلكم تاني واللي بيحبوني يدعوا لي كتير عشان لو مفيش حد يدعيلي.
• ودي مهمة أوي أوي أوي عايز الكل يسامحني على أي حاجة عملتها فيه بقصد لو بدون قصد.

تامر ضيائي: يارب إن كنت أنا القادم فأحسن خاتمتي وارزقني نطق الشهادة

واختتم تامر ضيائي بالدعاء لنفسه وقال: "اللهم إن كثر موت الفجأة من حولي وكثر موت الشباب غفلة، فـ يارب إن كنت أنا القادم فأحسن خاتمتي وارزقني نطق الشهادة عند الموت ويسر طلوع روحي وهون علي سكراتي فإني أحب أن أرحل في هدوء و سكينة وطمأنينة، ولا تقبض روحي إلا وأنت راضٍ عني لكي أكون عبدًا مقبولًا عندك حتى أليق بلقائك العظيم وإن كان لي من العمر باقي فاغفر لي ذنوبي ومعاصي نفسي الأمارة بالسوء واعفو عني وامحو لي كل ما يعرقل طريقي إليك وردني إليك ردًا جميلًا يارب العالمين".