محمد التاجي: ممكن اعمل شخصية منحرفة بالإيحاء ورفضت عمارة يعقوبيان لهذا السبب

تحدث الفنان محمد التاجي خلال ندوته بموقع تحيا مصر عن خطوطه الحمراء في مجال التمثيل، موضحا عدد من الأعمال الفنية التي رفضها والتي ندم على المشاركة بها بسبب مشهد خارج، من بينهم فيلم عمارة يعقوبيان وفيلم ديل السمكة.

محمد التاجي: اضطريت أعمل مشهد علاقة بين راجل ومراته في السرير 

وقال محمد التاجي خلال لقاءه بموقع تحيا مصر: كان عندي خطوط حمرا في أدواري زمان إنما دلوقتي أنا مش هتعرض لأعمال زي دي خلاص، يعني زمان مثلا في فيلم ديل السمكة اضطريت أعمل مشهد علاقة في السرير ومكنتش متخيل أنه هيبقى كدة أنا رايح ضيف للعمل أما وحيد حامد حكالي الحدوتة لقيتها كوميدية ولكن واحنا بنصور اتفاجئت بإنها علاقة زوجية بين الراجل ومراته في السرير واتخضيت وقولتلهم لا مش هقدر أعمله لكن هما قالولي انت صورت واحنا اتعلمنا من بدايتنا إن أنا طالما وافقت يبقى تحت أمر المخرج، وأما روحت قولت لمراتي حسك عينك تاخدي البنات وتتفرجوا على الفيلم ده.

محمد التاجي: اتخضيت من دور ليا في عمارة يعقوبيان وأنا بقرأ السيناريو 

وتابع حديثه، قائلا: ده متكررش تاني، حتى في فيلم عمارة يعقوبيان انا رفضته عشان كان فيه مشهد علاقة بينه وبين البطلة في المخزن، المشهد تقرأيه على السيناريو تتخضي، يعني وهو على الورق أنا اتخضيت امال أما انفذ بقى هيحصل اي، أنا لا أقبل لا نفسي ده وحتى لو هنعمل سينما مش نظيفة لازم تبقى قي حدود، أنا ممكن أعبر عن شخصية منحرفة بالإيحاء من غير الانحراف نفسه.

محمد التاجي: مضيت دوري في العتاولة على عمياني ومش شايف فيها شيء خارج

محمد التاجي: عايشين اليوم بيومه مش معانا رصيد في البنوك وبرامج المقالب معروفة

محمد التاجي يرد على انتقادات دوره في العتاولة 

ورد التاجي على انتقادات دوره في مسلسل العتاولة، فقال في نفس اللقاء: لو كنت لقيت أنه في مشهد هيجرح مشاعر حد مكنتش هعمله حتى حتة الهزار بيني وبين البنت أما كنا قاعدين في المنتزة كان كله كلام مكنش فيه فعل ولا في شيء جرح المشاهد أو فيه شيء خارج، فيه ناس وصل النقد عندها أنهم يشتموا بس أنا مبردش، أنا بقدم شخصية موجودة في المجتمع وفي نفس الوقت مخدشتش حياء الأسرة، لو حد قاعد مع والده أو والدته مش هيتكسف أنه يتفرج عليا، وانا ملمستش البنت طول المشاهد اللي بصورها، أنا عندي بنات ومقبلش أنه ده يحصل معاهم.