رموا عليه البنزين وولعوا فيه.. والد ضحية الغربية: ضيعوا ابني في رمضان | فيديو

تفاصيل مثيرة في التعدي على عمر ضحية الغربية، والذي تعرض لإلقاء مادة حارقة على جسده نتج عنها إصابته بإصابات مختلفة وحروق من الدرجة الثالثة، والتقى موقع تحيا مصر بوالد عمر ضحية الغربية والذي كشف تفاصيل ما حدث لأبنه عقب صلاة التراويح أول أيام رمضان.

صوابعه راحت.. ضحية الألعاب النارية في الغربية: مش هعمل كدة تاني|فيديو

لسه عريس وبنته شهور.. شقيقة ضحية القهوجي في طنطا: أقول لبنته ايه|فيديو

للانتقام منه.. 5 شباب يشعلون النيران في طالب جامعي بالغربية

كان صايم.. مصـرع شاب  في مشاجرة بالغربية

التفاصيل الكاملة للتعدي على عمر ضحية الغربية

وقال والد عمر ضحية الغربية لـ موقع تحيا مصر، اللي حصل واللي عمر قاله أنه كان واقف مع واحد صاحبه وناس من أصحاب صاحبه اتصلوا على صاحب عمر وقالوله ياسيد أنت مابتجيش ليه ومش بتعقد معانا ليه قالهم أنا مش هعقد معاكم تاني أنا هقف مع عمر، راحوا شتموه وشتموا عمر، راح سيد فاتح الموبايل وسمع عمر وابني قالهم هو أنا أعرفكم أصلا، قالوله هنشتمك وهنحزنك على شبابك.

والد ضحية الغربية: ولعوا فيه بـ البنزين في رمضان

وتابع والد ضحية الغربية، وعشان عمر مايعرفهمش سكت، وأول يوم رمضان عمر كان في الشعبية ولقى توك توك وقف ونزل منه 4 شباب وواحد منهم ماسك سكينة وحاول يغز عمر بيها، لكن واحد من اللي واقفين من أصحاب عمر شده قبل ما السكينة تيجي فيه، وبعدها واحد تاني مسك إزازة بنزين ورشها فالكل جري وعمر ملحقش يجري، فجه التاني مسك المولوتوف وحدفه على عمر، وفي لحظة عمر ولع هو وعربية جنبه.

والد عمر: كان بيجري في الشارع وهو مولع

واستكمل والد ضحية الغربية، الفيديو باين وعمر بيجري وهو مولع والناس اللي واقفة طبعا كانت بتحاول تطفي عمر لكن معرفوش، فواحد مسك بطانية وحضن عمر وطفاه، وبعدها أغمى عليه وتم نقله للمستشفى بحروق من الدرجة الثالثة في الوجه والأيد والرجل، ووشه اتشوه من الحروق، عمر ابني 18 سنة في كلية دراسات إسلامية وحافظ القرآن، ايه ذنبه يحصل فيه كدة.

والد ضحية الغربية: كان نفسه يطلع فنان ووشه باظ

وأضاف والد ضحية الغربية، جالي تليفون من أصحابه أن عمر حد رما عليه بنزين وولع فيه، ولما روحت لقيت واحد متبهدل وده مش عمر، كان بيقولي يابابا نفسي أبقى في الدعاية والإعلان، ضيعوا مستقبله وضيعوا ابني وكان منظره يحزن، وكل ما افتكر منظر ابني بتكوى من جوايا، وأي راجل مسئول لو ابنه حصل فيه كدة هيسكت.

وأكمل والد ضحية الغربية عمر، لما اغمى عليه وراح المستشفى كان بيتكلم ولكن لما راح المستشفى مش هو، وصوته وشكله كل حاجة اتغيرت، عمر ابني غاوي تصوير وكان نفسي يظهر في الإعلانات لكن خلاص وشه باظ وأنا عايز حق ابني وحلمه راح، والدكاترة لما كشفوا لسه مستنين أن الجروح والحروق تلم الأول وبعدها يتم استكمال العلاج ونعرف إذا كان في جروح هتسيب أثر أو لا.