يسرا: عيشت طفولة تعيسة مع أبويا.. وطلبت السماح من جوز أمي لأني أساءت معاملته

تحدثت الفنانة يسرا عن تفاصيل طفولتها مع والدتها ووالدها، ومدى الصعوبة التي واجهتها في هذه المرحلة، وذلك خلال لقاء لها ببرنامج بصمة، المذاع عبر شاشة تلفزيون قناة الشرق ديسكفري.

يسرا:  بعد الـ 14 مكنتش طفولة سعيدة لأن والدي أخدني من ماما

وقالت يسرا في تصريحاتها التي يرصدها موقع تحيا مصر: أنا اتربيت في وسط أمي وجدتي وخلاتي وخلاني وقعدت معاهم لغاية سن الـ 14 والحقيقة عملوا مجهود كبير جدا عشان يدوني حياة حلوة، أنا فاكرة أن أمي كانت تنزل تبيع أي حاجة عندها عشان تدخلني أغلى مدرسة عشان اتعلم كويس وأنا مدرستي كانت الانترسكول وقتها كانت حاجة كبيرة جدا.

وتابعت: ولحد سن معين أقدر أقول أنها كانت طفولة سعيدة، بعد الـ 14 مكنتش طفولة سعيدة لأن والدي أخدني من ماما فبالتالي عيشت مع والدي وأنا معرفوش وكان غريب بالنسبالي وحد مفيش بيني وبينه تفاهم، كان صعب جدا من حياة فيها كل حاجة ليكي لفاجأة حياة مفيهاش ولا حاجة ليكي، منعني من المدرسة، فمروحتش المدرسة فدرست في البيت فلما نجحت قالي نجحتي ازاي، كان دايما عندي تحدي أنك هتكوني وهتبقي وهتنجحي وهتعدي المرحلة.

يسرا: طلبت السماح من جوز أمي

واضافت يسرا في حديثها عن فترة طفولتها: وأنا فاكرة أنه قعدت سنة ونص مش بشوف حد ومش بكلم حد حتى ماما ودا كان شئء صعب جدا عليا هي كانت حياتي، ولو أمي مكنتش مربياني بقوة كان زماني معرفتش أكمل الحياة نفسها، وأنا اتعلمت منها كل حاجة، وجوز أمي اكتشفت حبي ليه بعد ما مشيت من عند ماما لأني عملت مقارنة بين الأب الحقيقي وبين زوج الأم اللي كان أب حقيقي وأكتر من أب، ولما بقى عندي 25 سنة صدفة قابلته في مدخل العجمي جريت عليه وطلبت منه السماح لأني عاملته وحش جدا وأنا طفلة ومكنتش عارفة قيمته، وكنت أنا سبب طلاقهم.

حقق 300 جنيها فقط.. سحب فيلم ليلة العيد بطولة يسرا من دور العرض

جزء من قلبي اتخلع بعد اعتزال الزعيم.. أبرز تصريحات يسرا

أخر أعمال يسرا

ومن الجدير بالذكر أن أخر أعمال يسرا فيلم ليلة العيد، الذي يعرض حاليًا في دور العرض السينمائية، يشارك في بطولة الفيلم كوكبة كبيرة من النجوم والنجمات، منهم: يسرا، ريهام عبد الغفور، سميحة أيوب، يسرا اللوزي، عبير صبري، هنادي مهنا، سيد رجب، أحمد خالد صالح، وغيرهم، ومن تأليف أحمد عبد الله، وإخراج سامح عبد العزيز.

وتدور أحداث الفيلم في إطار درامي، يتناول العمل قضايا المرأة، من خلال معاناة عدة سيدات يعشن على جزيرة ما، وتتعرض السيدات لعدة مشاكل وأزمات بسبب عدم تفهم بعض الرجال لحقوقهن.