محمد علي رزق يكشف سر فقدانه 50 كيلو من وزنه

كشف الفنان محمد على رزق، عن سر فقدانه 50 كيلو من وزنه وذلك خلال لقاء له مع الإعلامي عمرو خليل في برنامج من مصر.

تحيا مصر يرصد سر فقدان محمد علي رزق 50 كيلو من وزنه. 

تصريحات محمد علي رزق 

وقال رزق: انا اتقالي كتير اوعى تخس علشان هتخسر ومش هتشتغل وانت بقيت كاركتر ولو خسيت مش هتشتغل، بس أنا بصيت للموضوع بشكل تاني.

سبب إنقاص محمد علي رزق لوزنه

وتابع أنا مخستش علشان مش حابب شكلي ولا علشان أسباب صحية أنا بصيت لمستقبلي في المهنة يعني لو عايز اعمل دور ظابط مثلا، والمشكلة مش عندي لكن في ادوار الشكل هيحكمك وفي ادوار المخرجين مش هيشوفوك غير في اللي أنت عملته.

وأضاف أنا مكنش عندي مشكلة وانا تخين اعمل دور واحد شرير لأن التخن ملوش علاقة بالطيبة والشر لكن للأسف المخرجين اللي بيجازفوا قليلين اوي فانا قررت اخس لاني زهقت أنا بقيت بعمل نفس الأدوار مع اختلاف بسيط وانا شايف اني لو فضلت في دايرة واحدة هموت فنيا وانا شايف أن امكانياتي اكتر من شكلي فكان لازم اخس علشان اظهرها وكنت مراهن على دة.

واختتم محمد علي رزق حديثه قائلًا: أنا كنت 150 كيلو وبقيت 100 دلوقتي.

من جانبه، محمد علي رزق: اتصلت ببيتر ميمي علشان اباركله بعد الاختيار 1 وقلتله اني سمعت عن وجود جزء تاني وعايز اشتغل معاك فيه وجيه الاختيار 2 ومحدش كلمني وبعد كدة لقيتهم بيكلموني على الاختيار 3.

وتابع: أنا فاكر المكالمة كويس لاني كنت بحتفل بعيد ميلادي مع مراتي واتصلوا بيا ومسمعتش التليفون وبعد شوية لقيت صديقي بيكلمني وبيقولي أن الناس بتدور عليا وبيكلموني ومش برد وكلمت الكاستينج دايركتر وقالي ان في دور في الاختيار 3 بس هو مش كبير اوي قلتله مش مهم مساحة الدور المهم يكون حلو وانا عايز اشتغل في الاختيار.

وأضاف: الاختيار عمل فني بيوثق مرحلة وانا بحب اكون جزء من عمل فني بيوثق لمرحلة مهمة في تاريخ مصر، وحظي الحلو أن دوري كان شبة الأدوار اللي كنت بحلم اعملها زمان وانا صغير يعني أنا بحب رأفت الهجان، جمعة الشوان، الثعلب والأعمال اللي فيها جاسوسية وفجأة لقيت دوري كدة ففرحت.

واستطرد: الدور كان ممتع بالنسبالي وكل صحابي كانوا بيقولولي أن جالي دور شبة الادوار اللي بحبها ومشاهدي كانت مع احمد السقا ودي كانت حاجة حلوة لاننا مش أول مرة نشتغل مع بعض والكيميا كانت حلوة، والاختيار عمل وطني بيقدم نموذج انساني.