طلبت من بيتر ميمي أني أشارك في الاختيار وشبر ميه قريب لقلبي.. أبرز تصريحات محمد علي رزق

فجر الفنان محمد على رزق عدة تصريحات عن مشاركته في مسلسل الاختيار3 وشبر مياه، وذلك خلال لقاء له مع الإعلامي عمرو خليل في برنامج من مصر.

تحيا مصر يرصد تصريحات محمد علي رزق. 

تصريحات محمد علي رزق

وقال محمد علي رزق: اتصلت ببيتر ميمي علشان اباركله بعد الاختيار 1 وقلتله اني سمعت عن وجود جزء تاني وعايز اشتغل معاك فيه وجيه الاختيار 2 ومحدش كلمني وبعد كدة لقيتهم بيكلموني على الاختيار 3.

وتابع: أنا فاكر المكالمة كويس لاني كنت بحتفل بعيد ميلادي مع مراتي واتصلوا بيا ومسمعتش التليفون وبعد شوية لقيت صديقي بيكلمني وبيقولي أن الناس بتدور عليا وبيكلموني ومش برد وكلمت الكاستينج دايركتر وقالي ان في دور في الاختيار 3 بس هو مش كبير اوي قلتله مش مهم مساحة الدور المهم يكون حلو وانا عايز اشتغل في الاختيار.

محمد علي رزق في برنامج من مصر 

وأضاف: الاختيار عمل فني بيوثق مرحلة وانا بحب اكون جزء من عمل فني بيوثق لمرحلة مهمة في تاريخ مصر، وحظي الحلو أن دوري كان شبة الأدوار اللي كنت بحلم اعملها زمان وانا صغير يعني أنا بحب رأفت الهجان، جمعة الشوان، الثعلب والأعمال اللي فيها جاسوسية وفجأة لقيت دوري كدة ففرحت.

واستطرد: الدور كان ممتع بالنسبالي وكل صحابي كانوا بيقولولي أن جالي دور شبة الادوار اللي بحبها ومشاهدي كانت مع احمد السقا ودي كانت حاجة حلوة لاننا مش أول مرة نشتغل مع بعض والكيميا كانت حلوة، والاختيار عمل وطني بيقدم نموذج انساني.

محمد علي رزق يتحدث عن أعماله الفنية

وعن مسلسل شبر مياه قال: أنا بحب المسلسل دة جدا وهو من الأدوار القريبة لقلبي وهم بالترتيب هم ليالينا 80، شبر مية، الأب الروحي الأعمال دي وش الخير عليا.

وتابع: شخصية اكرم في شبر مية كانت رهان لأن أول مرة اقدم دور اب واول مرة دوري يبقى فيه هذا الكم الهائل من المشاعر الانسانية وكان في رهان عليا هل هفشل ولا هنجح وكان في ناس شايفة اني هفشل.

وأردف: في ناس كانت شايفة اني مناسب للدور وفي ناس كانت رافضاني في الدور، والوقت دة كنت لسة ما ثبتش نفسي وكنت لسة ببدا اعمل تحويل من الكوميدي للتراجيدي كنت عامل بس "ايوب" و"بحر" ودوري في جبل الحلال كان فيه جزء كوميدي لايت.

واختتم محمد علي رزق حديثه قائلًا: بعد أول اسبوع تصوير الناس اللي راهنت عليا كانت فرحانة بيا جدا والناس اللي كانت رفضاني اعتذرولي وانا مكنتش اعرف أن كان في رهان عليا، هما قالولي أننا كنا رافضين وجودك وشايفين أنك هتبوظ الدور بس أنت عامل الدور حلو جدا فالدور دة عزيز عليا.