تامر يحيى ينجو من حادث سير: حصلي نزيف جامد.. وقعدت ساعة ونص بدون مساعدة

كشف تامر يحيى، مدير أعمال النجم تامر حسني، عن تفاصيل تعرضه لحادث سير مروع على طريق مدينة العلمين الجديدة، وذلك من خلال منشور عبر حسابه الشخصي على موقع التواصل الاجتماعي فيسبوك.

تحيا مصر يرصد تفاصيل أحدث منشورات تامر يحيى عبر فيسبوك

تامر يحيى يتعرض لحادث سير

ونشر تامر يحيى صورًا توضح تدمير سيارته أثر الحادث، وعلق عليها قائلًا: "مافيش كلام ينفع يتقال غير الحمد لله وبشكرك يا رب على كل حال وفي كل حال ومن أجل كل حال وعلى كل تجربة صعبة أنت بتحطني فيها علشان تفكرني دائما بوجودك في حياتي وبتكون رسالة سواء أنت بتحبني وبتفديني من حاجه أكبر كان ممكن تحصل ليا أو لحد غالي عندي أو بتكون عايز تفكرني أنا فيه خطأ في حياتي محتاج انتبه ليه واصلحه والحمد لله أنا عندي إيمان شديد بتجارب ربنا ونعمه الكبيرة في حياتي.

وتابع: أنا ومحمد السواق الجميل اللي معايا ربنا نجانا من الموت امبارح في حادثة من أكبر الحوادث اللي عملتها  في حياتي.. واحنا راجعين امبارح من العلمين الساعة ١.٣٠ ظهرا فجأة ظهرت عربية نقل قدامه واقفة في نص طريق وادي النطرون في الحارة الثالثة وهو كان قبلها بثواني بيحاول يشغل حاجة في الشاشة اللي قدامه فمكانش في كامل تركيزه على الطريق وما قدرش يتفاداها.

تامر يحيى: العربية اللي خبطتي هربت

واضاف: العربية هربت من موقع الحادث بسرعة علشان عارف طبعا أنه غلطان وأنا ومحمد ما قدرناش ننزل من العربية غير بعد تقريبا ربع ساعة علشان الدم كان مغرق العربية والمشكلة اللي عقلي مش قادر يستوعبها أنه ازاي مافيش ولا air bag فتحت ؟ أنا مش هقدر اعدي الموضوع ده من غير ما الاقي إجابة فنية ليه لأني لو عرفت أنه ده خطا فني في اللي برمج السوفت وير أو ركب السينسورز أنا مش هسيبه إلا لما اسجنه لأنه كان حياتي هتنتهي أو أعيش بتشوهات في وشي طول عمري بسبب عدم فتح أي air bag.

واستكمل: أنا حصلي نزيف جامد بسبب كسر في مناخيري وقطع أخذ ٨ غرز وقطع داخل الفم أخذ ٣ غرز وشرخ في الساق وغالبا هعمل عملية في مناخيري بعد ٥ أيام.. ومحمد السائق الحمد لله كان حاطط حزام الأمان فربنا انقذه و كل اللي فيه مجموعه كدمات.

تامر يحيى: فضلت ساعة ونص من غير مساعدة

واستطرد: النقل هرب من موقع الحادث وأنا طلبت النجدة والاسعاف ١٧ مرة لكن للأسف كل مرة يردوا طالبين مني تحديد موقعي أو أي علامه مميزة في الصحراء وفي طريق صحراوي ودي يعني خليتني اتعصب عليهم لكن مافيش أي حاجة نفعت معاهم.. طلبت من كل اللي كلموني من النجدة أنه حد يبعتلي أي رقم تليفون ابعتله عليه لوكيشن واني بنزف نزيف جامد ومحتاج اسعاف فورا لكن كان الرد في كل مرة لا يا فندم ده مش اوبشن عندنا وقعدت ساعة ونص تقريبا بدون مساعدة.