مش عايز يوديني الساحل الشمالي.. حنان تطلب الخلع: مش قصة فلوس

مش عايز يوديني الساحل الشمالي.. بهذه الكلمات سردت حنان مأساتها مع زوجها، بعد زواج استمر 5 سنوات قائلة «الموضوع مش أني أروح الساحل، لكن أنا قصتي معاه أنه على طول شايف أن مفيش فرق أننا نروح ناكل من الشارع أو ناكل في مطعم نضيف، أو نشتري هدوم من على الرصيف أو من محلات، هو شايف أن الحاجات دي مجرد شكل بس».

تحيا مصر

لغز فتاة زراعات أخميم.. جارها إبتزها من أجل الأموال وقتلها في سوهاج

بنتكم عايشة معايا في الحرام.. مأساة زوجة: قال لـ خالتي تحرم عليا زي أمي وأختي|فيديو

حنان تطلب الخلع من زوجها والسبب صادم

وسردت حنان قصتها مع زوجها بعد أن تقدمت لـ محكمة الأسرة في الكيت كات بدعوى خلع للتخلص من زوجها قائلة «أنا عندي 33 سنة، وأتجوزت من 5 سنين كان عمري ساعتها 28 سنة، ويوم فرحي كان يوم عيد ميلادي، جوزي أكبر مني بـ سنتين وكان كلم عمي عشان يخطبني، وهو شغال في شركة وكان بيدور على عروسة، وعمي كلم والدي وجه البيت فعلا، وقعدت معاه مرة واحدة وأتخطبنا 4 شهور بس، وفي الوقت ده كنا بنجهز الشقة والفرح وملحقتش أعرفه كويس ويارتني كنت أتكملت معاه كتير أو عرفت شخصيته كويس».

وأضافت حنان قائلة «أول ما أتجوزنا، طلبت منه نروح فندق في أي مكان في شهر العسل وهو كان مصمم أننا نروح أي حمام سباحة يوم في القاهرة، أو أننا نسافر يومين إسكندرية، وقولتله لا مش هينفع ودارت بيني وبينه خناقة في أول أسبوع جواز، وقعدت يوم مش بكلمه، وبعدها بالعافية وافق وحجز 3 أيام في فندق بالغردقة بعد محايلة كتير عليه، وسافرنا فعلا ولما رجعنا بدأت المأساة».

حنان: مش عايز يوديني الساحل الشمالي

تابعت حنان عن قصتها مع زوجها «للأسف أنا مكنتش فاهمة حاجة وكنت بقول لسه وبكرة يتغير ونتفاهم سوا إحنا الأتنين، وبعد ما رجعت من شهر العسل بدأت المشاكل بيني وبينه، أقوله تعالى ننزل نخرج نروح سينما في مول تجاري، يقولي ومالها سينمات وسط البلد، ورغم أن فروق الأسعار مش كتير بس هو مكنش مشكلته في الفلوس أكتر ما كانت مشاكله كلها أنه شايف أن كدة بيتنصب عليه وأن كل حاجة زي بعضها ومش عايز يعترف بالفروق بين الحاجات النضيفة أو توكيلات الهدوم والرصيف أو عربيات الأكل في الشارع».

في اليوم ده حسيت شوية أنه بخيل.. أكملت حنان قصتها مع زوجها قائلة «روحنا نشرب حاجة راح موقفنا على عربية قهوة وطلب أتنين قهوة، وسألته ليه ما نروحش محل قهوة أو كافيه ونشرب براحتنا، قالي وندفع خدمة وشغل نصب والكوباية أم 10 جنيه ندفعها 50 جنيه عشان شوية حاجة تافهة وقعدنا على الرصيف أنا وهو وشربنا القهوة، وبعد فترة من الجواز بدأ يوديني المحلات اللي أنا عايزاها بعد مرار ومشاكل كتير، بس بردو كان في مشاكل».

زوجة: القصة معاه مش قصة فلوس

وأستكملت حنان قصتها قائلة «كان بيوافق بس عشان خاطري ويقولي أنا بروح عشانك وأنا مش بخيل بس عايزك تعرفي أن مفيش فرق بين المحلات، وخلال 5 سنين ربنا رزقنا بـ طفل هو دلوقتي عنده 3 سنين، وأخيرا طلبت منه نروح الساحل الشمالي وخصوصا أن حالتنا المادية مش وحشة، وهو قالي الساحل الشمالي ده نصب وبيضحكوا على الناس وخلاص، ومفيهوش أي متعة، وقولتله أنا عايزة أروح عشان مبقاش محرومة من حاجة وأحنا الحمد لله مبسوطين، ورفض وقالي هوديكي رأس البر أو هوديكي شقة في إسكندرية جميلة، قولتله أنا بحب إسكندرية بس أنا عايزة أروح الساحل، قالي مفيش ساحل، ولو مش عاجبك ده اللي عندي، وحصل بيني وبينه مشكلة كبيرة».

وأختتمت حنان قصتها مع زوجها قائلة «في النهاية لقيته بيقولي أنتي عايزة تعيشي بالفشخرة وخلاص ومش قصة أنك تروحي مكان، لكن المهم التقليد وبس وقولتله دي حياتي وأنا مش بطلب حاجة مش مقدرتك، وسبت البيت وروحت عند أهلي ومعبرنيش، وكلمته قالي عايزة ترجعي البيت مفتوح مش عايزة خليكي مكانك وبردو البيت موجود، روحت رفعت عليه دعوى خلع علشان أخلص من مشكلتي معاه».