مروة صبري: الواحد عشان يطلع الساحل لازم يعمل دراسة جدوى.. ولو روحت في العيد كنت هرجع بشحت

انتقدت الإعلامية مروة صبري غلاء الأسعار المبالغ به في الساحل الشمالي، مؤكدة أنه يجب أن يكون هناك حلول بديلة للحد من زيادة الأسعار، وذلك خلال مقدمة برنامجها  "قعدة ستات" عبر قناة "القاهرة اليوم".

تحيا مصر يرصد تفاصيل تصريحات مروة صبري

مروة صبري وأسعار الساحل الشمالي

وقالت مروة صبري: في عيد الأم وعيد الحب وأي مناسبة من المناسبات بنلاقي محلات الورد بتغلي، يعني لو الوردة بـ 20 جنيه يبيعها بـ 100 جنيه، ويقولك ده الموسم بتاعنا هو أنت جاي تبص لنا في الفلوس؟ هي دي الفكرة ولازم نلاقي بدائل.

وتابعت: أنا بالنسبة ليا مش هروح أصرف كل الفلوس دي هناك، إلا لو هاخد كل حاجتي من هنا وأروح على هناك، لأن فكرة أن الواحد يروح ويأجر مكان وهناك غالي جدًا جدًا، والواحد دلوقتي علشان يطلع الساحل محتاج يعمل دراسة جدوى علشان يشوف وضعه إيه.

مروة صبري في قعدة ستات

وأضافت: أنا بعترف بكل صراحة وبعترف أنا لو كنت روحت الساحل في العيد كنت هرجع بشحت، كنت هروح أقض 3 أو 4 أيام وهرجع أغني ظلموه في البيت، وقررت إني هقعد في البيت لغاية ما أعمل ثروة وبعدين أروح الساحل على أول شهر 8.

برنامج "قعدة ستات" تقدمه الإعلامية مروة صبري على شاشة "القاهرة اليوم" يوم السبت من كل أسبوع، وتستضيف من خلاله عددًا من الفنانات وتناقش قضايا مختلفة.

استياء جوري بكر من أسعار الساحل الشمالي

وسبق وأن أعربت الفنانة جوري بكر عن استيائها من أسعار المنتجات والخدمات في منطقة الساحل الشمالي، وذلك من خلال منشور عبر حسابها الشخصي على موقع تبادل الصور والفيديوهات إنستجرام.

وقالت جوري بكر في مقطع فيديو لها من خلال خاصية استوري: أنا بكره الساحل أو الأصح اللي بيحصل في الساحل، وأنا متضايقة من اللي بيحصل في الساحل، ولولا أن جوزي بيحب يروح هناك مكنتش جيت.

وتابعت: لأن فيه قلة أدب بتحصل، وفيه ناس قليلة الأدب، وفيه قلة أدب في الأسعار، وفيه ناس ممكن تقولي ايه اللي وداكي، بس أنا مضطرة، وأنا الحمد لله راضية بس ايه الأسعار دي.