فيفي عبده: شيرين عبد الوهاب من حقها تغلط ومحمد رمضان مش عارفه ليه ربنا رازقه

تحدثت الفنانة الكبيرة فيفي عبده، عن عدد من نجوم الوسط الفني وعلى رأسهم شيرين عبد الوهاب ومحمد رمضان، وذلك خلال تصريحات تليفيزيونية.

تحيا مصر يرصد تصريحات فيفي عبده. 

تصريحات فيفي عبده

وقال فيفي عبده: شيرين عبد الوهاب المصرية الجدعة الجميلة، كونها بتقع فـ ده عشان إحنا بشر، والناس مش لازم الناس تلوم الفنان، لأنه بني أدم ومن حقه يغلط ويهزر، لأنه لازم يكون طبيعي.

وتابعت: الممثل مش هيقعد زي تمثال الشمع، لازم نكون طبيعيين، هي أكيد مش قصدها تغلط، وهي لذيذة ودمها شربات.

وأضافت: محمد رمضان مهما تقولوا له، هو ربنا بيحبه ورازقه، مش عارفة ليه رازقه، بس منقدرش نقول ليه.

واستطردت: هو ربنا مديله نجاح ورزق وحب من الناس، أكيد عمل حاجة جميلة لأمه وأهله عشان كدة ربنا بيديله كل اللي هو في دلوقتي.

فيفي عبده في برنامج صباح العربية

من جانبه، قالت فيفي عبده خلال استضافتها في برنامج صباح العربية: سر حب الناس ليا هو التجارة مع الله، وده حب من الله وحب أمي وأبويا وأنا طول عمري تحت جزمتهم، وكل الناس بتحبني حتى الأطفال، وعندي حفيدي سنتين ونص مش بيقول غير عاوز فيفي عبده ويمسك الصورة ويبوسها، أنا هتجنن نفسي أعرف ليه بيحبوني الحب ده؟ أي بيت متفق على حب فيفي عبده، وسعادتي لا توصف وأنا بشوف الأطفال جايين يجروا عليا وعاملين علامة الـ 5.

وتحدثت عن موسم الرياض وقالت: أنا بسمع عن موسم الرياض، ومكنتش متخيلة إن المستشار تركي آل الشيخ عامل الحاجات اللي موجودة، أنا تمنيت إن العالم كله يجي يشوف الرياض، وأنا بحب الشعب السعودي، وأتمنى إني أعمل مسرحية في موسم الرياض، والجمهور مجرد ما بيسمع صوتي بيعرفني لأن صوتي مميز.

وكشفت فيفي: حاولت أدخل العالم العربي مع مصر في سناب شات وبطلع فيديو كل يوم واعرفهم انا بعمل ايه وجمعت العالم العربي وبعدين خدت عين وخدت عين وفضلت 3 سنين عيانة.

كما كشفت فيفي عن سر جملة 5 أمواه التي اشتهرت بها وقالت: كنت بقول لبنتي اعملي 5 أموه للفانز بتوعي وبنتي خريجة الجامعة الامريكية وبجيبلها مدرس عربي عشان كلامها العربي مكسر، ومن ساعتها اتشهرت بالكلمة دي.

وتحدثت فيفي عن بدايتها الفنية وأهمية مسرحية حزمني يا وقالت: حزمني تنبأت بالنجاح بيها من قبل ما اعملها وقبلها عملت مسرحيتين بس توقعت أن حزمني يا هتكسر الدنيا و زي مسلسل كيداهم وقدمت فيفي عبده اللي جوايا للجمهور.

وأضافت: مسرحية حزمني يا كانوا بيجوا الناس ليها من كل مكان و بيجوا بالطيارت يحضروها ويسافروا وقدمنا فيها وجوه كتير ودلوقتي ابطال.