مروة عبد المنعم تكشف حقيقة زواجها من أحمد عزمي وسبب حبس والدها لها.. تصريحات جريئة

فجرت الفنانة المصرية مروة عبد المنعم تصريحات جريئة خلال حلولها ضيفة على برنامج واحد من الناس الذي يقدمه الإعلامي عمرو الليثي.

ويرصدها تحيا مصر خلال السطور التالية:

أبرز تصريحات مروة عبد المنعم 

عملت مشروع المسرح بتاعي ومحدش من زملائي في الوسط اتصل عليا يباركلي، والشلالية هي اللي بتحكم الوسط للأسف

عمري ما رفعت التليفون وطلبت شغل من حد، وكنت بشتغل كويس، ولكن فجأة كل الدنيا وقفت مروة واحدة ومحدش بيبعتلي أدوار خالص دلوقتي.

مسلسل أم كلثوم كان أول عمل ليا ووالدى فوجئ بالناس بتقوله بنتك بتمثل فى مسلسل أم كلثوم، وكان رد فعله صعب جدًا وجابني من شعري على السلالم وحبسني في الفيلا بتاعتنا في البلد.

والد مروة عبد المنعم يحبسها بعد أول عمل فني لها

لما والدي حبسني في الفيلا بعد ما طلعت في مسلسل أم كلثوم، قُلت إني هنتحر وهربت من البيت روحت لماما في ميت غمر، وقُلت ليهم أنا همثل ومش عاوزه منكم حاجة، واشتغلت مندوبة مبيعات في الشارع علشان أصرف على نفسي.

- أقنعت بابا إني أكمل في المعهد قسم إخراج وقٌلت ليه أنا ماضية 4 مسلسلات ولو معملتهمش هتحبس، ومكنش في مسلسلات.

- أنا سميت ابني يحيى على اسم الفنان يحيى الفخراني، لأني وقت ما حملت كنت بعمل مسلسل عباس الأبيض وقُلت ليه لو طلع ولد هسميه على اسمك لأني بحبه جدًا.

مروة عبد المنعم تنفي شائعة زواجها بالفنان أحمد عزمي

كان في إشاعة بزواجى من الفنان أحمد عزمي، والحقيقة إني متجوزتش غير مرة واحدة من بابا الأولاد وانفصلنا.

مبتمناش بنتي حور تدخل مجال التمثيل، علشان مجال متعب جدًا وصعب وهياخد من حياتها كتير.

شايفة إن التيك توك فرصة جيدة أنفس فيه عن الأفكار اللى جوايا، ولم أفشل كمقدمة برامج فى برنامج "ولاد وبنات".

كان زوج أختى بالمطار من فرنسا واحنا ٦ أخوات ومعنا أولادنا رايحين نستقبله وكنا ٢٦ فردا تقريبا، والطيارة اتأجلت وخلاص مروحين وابنى دخل الحمام ونسيته وماشيين وانا فى الجراج افتكرته وجريت عليه وأول ما شافنى انهار، وأنا عندي مشكلة انى بنسى جدا، ومرة نسيت الجناينى فى البيت وقفلت عليه وخرجت، واتصل بيا يا مدام انتى قفلتى عليا البيت ومشيتى