مأساة زوجة: جاب جارتى البيت ولما قفشتهم قالى كنا بنعلق زينة رمضان

كنت فاكراه هيتوب فى رمضان بس الخيانة بتجرى فى دمه.. بتلك الكلمات روت زوجة لتحيا مصر من داخل محكمة الأسرة عن زوجها الذى أعتاد على خيانتها مع نساء أخريات وحين تواجهه زوجته لا يعترف لها بفعلته بل يتعمد أن يشعرها بأنها هى من تظلمه وتعتقد أمور لا أساس لها من الواقع والحقيقة حتى قررت الزوجة الأنفصال عنه ورفع عليه دعوى طلاق للضرر من داخل محكمة الأسرة .

حسن الخاتمة.. ماتت صائمة معتمرة ودُفنت في أطهر بقاع الأرض|قصة الحاجة هبة

وحدها تصارع النيران.. تفاصيل مأساوية في وفاة الطفلة كندة بحريق شقة القليوبية

خاننى يوم خطوبتنا 

بدأت الزوجة حديثها لتحيا مصر :" أنا وجوزى متجوزين من 9 سنين وعندنا ولد وبنت جوزى راجل عينه زايغة وبيحب الستات وده عرفته عنه يوم خطوبتنا لما كنا عاملينها فى قاعة كبيرة وكنت عازمة كل صحابى البنات واتفاجئت أنه خد رقم واحدة منهم يوم الخطوبة من غير ما أخد بالى وفضل يكلمها لمدة شهر ولما واجهته قالى أن هى اللى بتكلمه ورامية نفسها عليه عشان تخطفه منه وأنا عشان كنت بحبه سامحت وعديتها عشان العلاقة تكمل للجواز وأكتشفت أن دى كانت غلطة عمرى وأن ربنا كان بيبعتلى إشارات أن الراجل ده خاين وأنا مخدتش بيها ".

كان بيستغل شغلى ويجيب ستات فى الشقة 

وتابعت الزوجة حديثها :" عيشت مع جوزى 9 سنين كان كلهم خيانة وكدب أنا بشتغل فى  محل مفروشات بقف أبيع فيه بتاع والدى الله يرحمه وهو كان دايماً يستغل فترة غيابى فى الشغل ويجيب فيها ستات وينيمهم على سريرى وقفشته مرتين منهم مرة كانت مع واحدة عرفها من على النت وكنت عارفة أنها هتجيله من خلال الرسايل اللى شوفتها بينهم على تليفونه ومرة كانت مع واحدة قريبته من بعيد وكان نفسه يتجوزها وهى رفضت وفى كل مرة بشوفهم بعينى كان برضه بيكدبنى ويقولى " أنتى فاهمة غلط وأنتى اللى شكاكة وبتظلمينى " وعشان عيالى كنت بسكت وأستحمل ".

جاب جارتى البيت وقالى دى بتساعدنى فى تعليق الزينة 

وأختتمت الزوجة حديثها :" جوزى قبل رمضان بـ3 أيام لما كنت مكثفة عدد ساعات شغلى عشان أجيب فلوس تكفى لأكل الشهر كله جيت فى يوم أضطريت أرجع بدرى عشان والدتى أتصلت بيا وكانت محتاجة أزازة زيت وسكر أديهملها من عندى ولما طلعت البيت سمعت صوت واحدة مع جوزى فى أوضة النوم وعيالى كان منزلهم يلعبوا فى الشارع دخلت فتحت باب الأوضة فورا ً ولقيتها جارتى اللى فى الشقة اللى قصادنا وقاعدة مع جوزى وبتدلع عليه وأول ما شافتنى خدت بعضها ومشيت وجوزى قالى " متفهميش غلط  ده أنا طلبت منها تيجى عشان تساعدنى فى تعليق زينة رمضان عشان عارف أنك هترجعى تعبانة ومش هتقدرى تعمليها " المرة دى قررت فيها أنها هتبقى آخر مرة أستحمل فيها خيانة جوزى ليا وفى بيتى وجريت على المحكمة عشان أرفع عليه دعوى طلاق للضرر وأخد منه كافة حقوقى وأرتاح منه ".