شيرين رضا: أؤمن بالصداقة بين الرجل والمرأة.. واتعلمت دا من أهلي

كشفت الفنانة شرين رضا عن رأيها في علاقة الصداقة بين الرجل والمرأة، وذلك خلال حوارها اليوم ببرنامج ab talks مع الإعلامي أنس بوخش.

تحيا مصر يرصد تفاصيل تصريحات شيرين رضا

حيث قالت شيرين: “أؤمن بالصداقة بين الجنسين، كنت محظوظة جدًا بعلاقات الصداقة مع الرجال، عندي صديقي من لما كان عندي 11 سنة، ولسه لغاية دلوقتي أصدقاء، ومرينا بكل حاجة مع بعض في حياتنا”.

رأي شيرين رضا في الصداقة بين الجنسين

وتابعت: “وأظن أن الناس مش متقبلة الفكرة دي، عشان بيبصوا للفكرة على أنها رجل ومرأة وليس كشخصين، أو صديقين.. لازم نلغي فكرة النوع، ونكون بس أصدقاء، وكان صعب جدًا في منطقتنا أن الكبار يفهموا دا عشان مكبروش على الطريقة دي، ودلوقتي الموضوع بقى سهل، ومقبول”.

واضافت: “وأنا أهلي كان مخهم متفتح، وأنا اتعلمت الكلام دا منهم، أني أبص للناس كبشر، مش أبص ليهم من الناحية الجمالية أو المادية”.

علاقة شيرين رضا بوالديها

وعن علاقتها بوالديها قالت: “سافرت في كل مكان، والدي اتعود ياخدني في الإجازات، أنا وهو نسافر لوحدنا، ومتكلمش معايا أبدًا كطفلة، كان عايزني أخد تجارب كتيرة واستخدم عقلي ومعتمدش عليهم، ودفعني عشان أكون مستقلة بذاتي”.

واضافت: “دور أمي كبير أوي في حياتي، لأنها كانت بتخاف عليا أوي، كانت مجنونة بكل حاجة تتعلق بيا.. ودايما بول ياريت أبويا وأمي كانوا جابولي إخوات، كان نفسي حد يشاركني كل حاجة بتحصل”.

تصريحات شيرين رضا عن فيلم الملحد

وعلى الصعيد الآخر، كشفت الفنانة شيرين رضا عن حقيقة ترويج فيلم “الملحد” الذي يتولى تأليفه الإعلامي الشهير إبراهيم عيسى، للإلحاد، نافية كل ما يتردد من تلك الأنباء ومشيرة إلى أنه الهدف الأساسي منه تفتيح عقول المشاهدين على أفكار جديدة.

قالت شيرين رضا خلال برنامج it’s show time: “الهدف من الفيلم هو أننا نفتح مخنا ونشوف حاجات تانية، نشوف أفكار تانية، لو في واحد ملحد إزاي بيبقى ملحد وبيجي منين الإلحاد ده، وإزاي نقدر نتصرف فيه، وإزاي نقدر نمنعه، وإزاي أهله بيستقبلوا صدمة إن ابنهم يقولهم أنا ملحد”.