مبيتبلش في بوقه فولة.. زوجة للقاضي: جوزى طيب وبينقل الكلام زي الستات

بيحلفلي علي المصحف أنه مش هينقل اسرارنا لحد وبلاقي بعدها كل الدنيا عارفة .. بتلك الكلمات روت زوجة لتحيا مصر عن زوجها الذي لا يعرف كيف يكتم أسرار زوجته الخاصة او اسرار بيتهم وأطفالهم مما وضع الزوجة في مشاكل عديدة بينها وبين اقاربها فأضطرت لرفع عليه دعوي خلع بمحكمة الأسرة . 

جوزي طيب زيادة عن اللزوم 

بدأت الزوجة حديثها لتحيا مصر :" أنا وجوزي متجوزين من 4 سنين وعندنا بنت جوزي معروف عنه من الناس أنه طيب وغلبان وأنا حبيته واتجوزته عشان كدة عشان كنت بقول لنفسي أن طيبته دي هتخليه ميقساش ولا ييجي عليا لكن مكنتش  اعرف أن هيبقي فيه ابعاد تانية وحشة ". 

بيحب الكلام الكتير زي الستات 

وتابعت الحديث :" الـ4 سنين اللي عيشتهم مع جوزي مليانين مشاكل من النوع الغريب بسبب أن جوزي بيحب الكلام الكتير زي الستات وده أثر علي علاقتي بيه لأن كل حاجة كنت بقولهاله خاصة بيا وبالبيت كنت بلاقي كل الناس عرفاها زي مثلاً في مرة كنت بحكيله أني عايزة أعمل وشم في أيديا عشان هو بيحب الحاجات دي واتفاجئ بعدها بتاني يوم أن قال لأخته وأخته وحماتي أتصلوا بيا وقالولي " أنتي عايزة تعملي وشم لية أنتي مش عارفة أنه حرام ؟" أنفجرت فيهم وقولتلهم " أنتوا مالكم دى حرية شخصية وحاجة بيني وبين جوزي " لكن من جوايا كنت حاساه غلطه هو لأنه راح حكالهم حاجة مينفعش تتقال لحد ولما روحت قولتله " أنت بتتكلم كتير ليه في حاجة تخصنا أنا وأنت بس ؟" كان بيعتذر وبيوعدني أنها مش هتتكرر تاني".

جوزي مش راضي يعترف بيا وبيقولي اتسرعت ومكنتش لسة عرفت ستات أحلي منك.. مأساة زوجة

مفهماهم أنها أرملة..زوج للقاضي: مراتي مصورة نفسها مع رجالة وصاحبي اللي كشفها

وقع بيني وبين ناس كتير بحبها 

واختتمت الزوجة حديثها :" جوزي بالرغم من أنه حلفلي علي المصحف أنه مش هينقل كلام بيننا لحد تاني مكنش برضه بيلتزم بحلفانه وفي مرة كنت قاعدة مع والدتي وقالتلي " أنتي أزاي تحكي لجوزك علي المرة اللي أبوكي خانني فيها ؟" ارتبكت جداً لأني كنت فعلاً حكيت لجوزي علي الموضوع ده وقالتلي كمان أنه لما راحلها لوحده عشان يبعتلها أكل كنت طبخهولها راح قعد معاها وفضل يرغي ومواقف تانية كتير مهما احكيها مش هتخلص وكلها بتدل علي أن جوزي مش مصدر ثقة وده اللي خلاني ارفع عليه في المحكمة قضية خلع قبل ما يخسرني مل الناس اللي حواليا ".