نصبت عليه في 60 ألف جنيه.. زوجة للقاضي: جوزي اتعرف علي واحدة خربتلنا بيتنا

"جوزي اتضحك عليه من بنت صغيرة في السن وخدت كل اللي حيلتنا.." بتلك الكلمات روت زوجة لتحيا مصر من داخل محكمة الأسرة عن زوجها الذي كان علي علاقة بفتاة لم يتجاوز عمرها ال20 عاماً وقامت بالنصب عليه هي وبعض الأشخاص اللذين كانوا من طرفها لتكتشف الزوجة ذلك وتقوم برفع عليه دعوي نفقة لأطفالها بعد أن وصل الأمر بينهم للطلاق . 

جوزي مش بيسيب التليفون من أيده            

بدأت الزوجة حديثها لتحيا مصر :" أنا وجوزي متجوزين من 20 سنة وعندنا ولدين تؤام وبنت وأكبرهم عنده 13 سنة لأننا خلفنا متأخر حياتنا مع بعض كانت تقليدية جداً ولما كانت بتحصل مشاكل كنت أنا بتحملها واعديها عشان عيالي وجوزي في العموم راجل كويس بيعاملنا بإحترام وبيتعب ويشقي عشاننا لكن كان عنده عيب خطير وهو أنه مكنش بيسيب التليفون من أيده ولما كنت بسأله " بتعمل أية عليه كل ده وأية اللي شاغلك اوي كدة ؟" كان يقولي أنه بيسلي نفسه او بيكلم أخواته ومش أكتر من كدة".

اتعرف علي واحدة من النت وضحكت عليه 

وتابعت الزوجة الحديث: "اللي حصل من سنة أن جوزي رجعلي في مرة من الشغل وكان قايلي أنه اليوم ده هيسحب من البنك 60 ألف جنيه لأن والده كان تعبان في المستشفي والفلوس دي كانت علشانه لكن اليوم ده جوزي رجع من غير الفلوس ومن غير العربية كمان كنت قاعدة في ذهول ومش فاهمة أزاي حصل معاه كدة وهو لما حس أنه محتاج حد يحكيله ويلحقه من اللي حصل  أعترفلي وقال " أنا كنت علي علاقة ببنت عندها 19 سنة اتعرفت عليها من النت وكنت هتجوزها وكنت المفروض اقابلها أنهاردة واخرج معاها وهي كانت عارفة أني خارج من البنك بفلوس في العربية راحت طلبت مني اوصلها عند واحدة صاحبتها ودخلتني من طريق مقطوع وكان في 3 شباب مستنينها في الطريق ده ولما شافوني هددوني أني انزل من العربية او هيحطوا السكينة علي رقبتي ويقتلوني نزلت وسيبتلهم الفلوس والعربية وجيت علي هنا".

مراتي هددتني تحرمني من العلاقة لو مجيبتلهاش عربية تتفسح بيها.. مأساة زوج

«بتبقى جنبي علي السرير وبتدعي عليا في سرها» .. زوج للقاضي: حالي اتوقف بسبب مراتي أم عيالي

وقفت جنب جوزي وبعدين طلبت الطلاق

واختتمت الزوجة حديثها :" جوزي عنده 40 سنة يعني البنت أصغر منه بضعف عمره ومع ذلك حبها ووثق فيها من ورايا وكمان كان عايز يتجوزها وهو يعرفها من علي النت مش أكتر فكان طبيعي تعمل فيه كدة وتضحك عليه لكن أنا عشان ست أصيلة بيعت دهبي كله وطلبت كمان من أهلي فلوس عشان أساعد والده المريض اللي في المستشفي وجوزي وقتها كان مذهول من موقفي وكانت الدموع والندم مش بيفارقوه لكن أنا عزة نفسي مسمحتليش أكمل حياتي معاه وطلبت الطلاق وهو بذل معايا محاولات كتير عشان ميطلقنيش لكن في الآخر أتطلقنا وجيت أنهاردة للمحكمة عشان اطالب بنفقة لأولادي لأن الفلوس اللي هو بيدهالنا مش بتكفينا عمري ضاع مع جوزي وفي الآخر السنين ده انتهت بالطلاق والمحاكم بس مفيش حاجة في قلبي هقولها غير حسبي الله ونعم الوكيل".