«بتبقى جنبي علي السرير وبتدعي عليا في سرها» .. زوج للقاضي: حالي اتوقف بسبب مراتي أم عيالي

الستات كلها بتدعي لرجالتها لكن أنا مراتي بتدعي عليا .. بتلك الكلمات روى زوج لـ تحيا مصر من داخل محكمة الأسرة عن زوجته ذو اللسان السليط والدعوات المجرحة التي تدعيها لزوجها معتقدة أنه يبخل عليها وعلى أولادها في تسديد احتياجاتهم المادية وغير مبالية بالظروف السيئة والأزمات التي يمر بها في عمله حتي قررت رفع عليه دعوى خلع بمحكمة الأسرة لتتخلص منه وتحرمه من أطفاله ليقف هو أمام القاضي محاولاً تبرير ما كان يمر به مع زوجته لكن دون جدوى.

مراتي مش بتشبع فلوس وطلباتها كتير من ليلة الدخلة 

بدأ الزوج حديثه لتحيا مصر :" أنا ومراتي متجوزين من 10 سنين وعندنا طفلين أنا شغال في طب الأسنان والحمدلله الوضع المادي معايا كويس مراتي من ليلة الدخلة وهي طلباتها كتير يوم فرحنا واللي المفروض تبقي أسعد لحظة في حياتنا لقيتها بتطلب مني أنها عايزة تسافر وتخرج على الأقل يومين كل أسبوع وأنها عايزة تدخل أولادنا اللي لسه مجوش الدنيا أغلى مدارس وأغلى تعليم  وأنا كنت بسكت وعشان بحبها كنت بوافقلها على كل طلباتها وعيشت معاها 10 سنين كنت بديها كل اللي ورايا واللي قدامي وهي مكنتش برضه بتشبع ولما خلفنا طفلين الموضوع زاد وكبر وبقيت بتطلب لنفسها ولأولادها طلبات مبتخلصش ".

دعت عليا بسبب تليفون جديد لوالدتها  

و تابع الحديث :" مراتي طلبت في مرة أني أشتري لوالدتها تليفون يوم عيد ميلادها نوعه غالي جداً وقالتلي أنها خلاص وعدتها أني هجيبهولها عشان نفسها فيه والتليفون ده يعدي الـ30 ألف جنيه وقتها رفضت وقولتلها " الفلوس دي ولادنا أولى بيها والمبلغ كبير جداً أنه يضيع على تليفون وهي معاها واحد ده غير أنها عمرها ما دخلت علينا حتي بكيس فاكهة " وقتها مراتي اتحولت 180 درجة وقالتلي كلام أنا عمري ما هنساه بقية حياتي وشوفت منها شخصية كانت أول مرة تظهر وقالتلي  " إلهي ربنا يعيشك في غم بقية حياتك وكل اللي تطلبه من حد وتحتاجه متلاقيهوش أنت كمان " ودعوات تانية كتير عليا بقيت بتطلع منها في كل خناقة أو طلب ارفضهولها غصب عني ".

حالي اتوقف بسبب مراتي وراحت خلعتني 

واختتم الحديث:" مراتي بسبب دعواتها الوحشة اللي أنا كنت فاكرها كلام وقت الغضب وخلاص اكتشفت أنها بقيت السبب في وقف حالي من ساعتها  وشغلي بقي في النازل ومبيجيليش عيانين وبالفعل بقيت عايش في غم ونكد طول الوقت بسبب أني مبقيتش عارف أصرف على عيالي زي الأول وهي لما لقيت الوضع معايا مادياً وقع أوي كده راحت المحكمة تخلعني بحجة أني بخيل عليها وقالت عليا كده للناس كلها حرمتني من عيالي وشوهت صورتي ومفيش في قلبها رحمة ناحيتي وأنا عمري ما قصرت معاها في شيء ده أنا أديتلها 10 سنين من عمري كنت من إيدها دي لأيدها دي لكن خلاص كل ده اتنسى ووقفتني في المحاكم لكن حقي عند ربنا ومش هتنازل عنه ".