معيشني في حديقة حيوانات.. زوجة تطالب بالخلع: جوزي بيحب الكلاب والقطط أكتر مني ومش راضي يخلف

الستات كلها بتتجوز وتعيش في عش الزوجية لكن أنا كنت عايشة في حديقة حيوانات .. بتلك الكلمات روت زوجة لتحيا مصر من داخل محكمة الأسرة عن زوجها وحبه للحيوانات الذي أصبح يأثر علي حياتهما معاً وعلي نظافة بيتهم وأساس المنزل الذي يعيشون فيه مما جعل الزوجة تهرب منه وتعود للعيش مع والديها خصوصاً رفضه لفكرة الإنجاب مفضلاً الحياة وسط الحيوانات فقط مما جعل الزوجة ترفع  عليه دعوي طلاق للضرر بمحكمة الأسرة .  

تحيا مصر

جوزي كل يوم يشتري حيوان مختلف وبيحبهم أكتر مني  

بدأت الزوجة حديثها لتحيا مصر :" أنا وجوزي متجوزين من 4 سنين أيام الخطوبة كان عنده كلب وكان بيحبه اوي لكن مكنتش اتخيل ابداً أن بعد الجواز الموضوع هيتوسع معاه بالشكل ده ويشتري كل أنواع الحيوانات ويعيشهم معانا في البيت بقي عندنا قطط وكلاب وعصافير وسمك وضفاضع وكتاكيت وحيوانات تانية كتير ".

مش راضي يخلف وأهلي مش راضيين يزوروني

وتابعت الحديث :" جوزي من يوم ما اتجوزنا وهو مأجل موضوع الخلفة عدت 4 سنين ومازال مش راضي نخلف بسبب أنه خايف لما نجيب اولاد يضطر يمشي الحيوانات دي من البيت ودي حاجة قهرتني وخليتني مش طايقة العيشة معاه ولا طايقة اخليه يلمسني لأني حسيت أنه أناني ومش بيفكر غير في سعادته هو وبس واللي تعب نفسيتي أكتر أن اهلي  لما جم يزوروني  مكنوش متحملين الأزعاج اللي موجود في بيتي و البهدلة اللي شافوها بسبب الحيوانات اللي موجودة ده غير الريحة الصعبة اللي موجودة في البيت بإستمرار ومهما بنضف مش بتروح وده خلاهم يبطلوا يزوروني ويدخلولي بيت ".  

زوجة للقاضي: جوزي بيصحيني في عز الفجر العب معاه كوتشينة بعد ما ساب شغله وبقي عنده فراغ

«جوزي بيحب الست اللي تضربه وتبهدله قدام الناس وتبقي هي الراجل في العلاقة الزوجية».. مأساة زوجة

عفش بيتي كله اتخرب وقولت لجوزي يا أنا يا هما في البيت  

واختتمت الزوجة حديثها  :" الفترة الاخيرة بقيت بروح عند بيت أهلي وابات عندهم وفي مرة رجعت من عندهم لقيت كراسي الأنتريه الكلاب مقطعاها كلها بأسنانها وقفت مفزوعة من المنظر وخصوصاً لما عرفت أن جوزي سابهم لوحدهم في البيت وراح شغله وطبعاً حيوانات زي دي لازم حد يفضل قاعد معاهم طول الوقت عشان ميخربوش الدنيا لكن جوزي ولا في دماغه هو بيشتريهم وعايزني أنا كمان اللي ارعاهم اتصلت بيه وقولتله أني هلم هدومي وهمشي ويا أنا يا الحيوانات دي في البيت وهو بدل ما يتمسك بيا قالي " اعملي اللي يريحك الحيوانات دي مدفوع فيها شئ وشويات وأكيد مش هفرط  فيهم بالسهولة دي روحي عند بيت اهلك اهديلك يومين تلاتة وابقي ارجعي " دمي كان بيغلي من بروده ووقتها فعلا مشيت ورجعت بيت اهلي ومرجعتش تاني وصورت الشقة قبل ما امشي ورفعت عليه قضية طلاق للضرر عشان اخلص منه وارجع لحياتي الطبيعية تاني في هدوء ونضافة ووسط بني آدمين مش وسط حيوانات ".