«جوزي بيحب الست اللي تضربه وتبهدله قدام الناس وتبقي هي الراجل في العلاقة الزوجية».. مأساة زوجة

كنت فكراه راجل وطلع مريض نفسي وعايز يتعالج ... بتلك الكلمات روت زوجة لتحيا مصر داخل محكمة الأسرة عن زوجها ورغبته في العيش مع امرأة تسيطر عليه بالكامل وتكون هي بمثابة الرجل حتي في العلاقة الزوجية مما جعل الزوجة تشعر بعدم الراحة معه والخجل من نفسها أنها تعيش في هذا الوضع المريب حتي قررت الأنفصال عنه ورفع عليه دعوي خلع داخل محكمة الأسرة .

جوزي أيام الخطوبة كان بيطلب مني حاجات غريبة 

بدأت الزوجة حديثها لتحيا مصر :" أنا وجوزي متجوزين من 3 سنين وعندنا بنت جوزي يبقي أخو صاحبتي المقربة وهي اللي عرفتنا علي بعض وفي الوقت ده لما اتجوزنا كان عندي 18 سنة وهو كان عنده 30 سنة كنت لسة صغيرة و أنجرفت ورا مشاعري وكلامه الحلو لكن بالرغم من كدة كان في حاجات كتير بيقولهالي وطلبات بيطلبها مني في فترة الخطوبة  مكنتش بفهمها بسبب سني الصغير والحاجات دي من ضمنها أنه كان بيطلب مني أني اكلمه بنبرة صوتها عالي وأني أبقي عصبية ومش هادية طول الوقت ولما كنت بسأله ليه ؟ كان يقولي " أنا بحب البنت اللي شخصيتها قوية عشان تساعدني في تربية ولادي " لكن الموضوع طلعت ابعاده أكبر من كدة بكتير ".

ضربته مرة وكان فرحان 

وتابعت الزوجة الحديث :" بعد الجواز اكتشفت أن جوزي راجل مش طبيعي لما كانت بتحصل بيننا مواقف بالصدفة واتصدم من ردود افعاله زي أن في مرة كنا بنتكلم وجت سيرة واحدة كان يعرفها زمان ولقيته بيتكلم عنها حلو وحسيت أنه بيحنلها فغصب عني ضربته علي كتفه جامد عشان يسكت ويحترم أني أبقي مراته وميفعش يجيبلي في سيرة واحدة تانية وهو فاجئني أنه كان فرحان وقالي " أنتي بتعجبيني أوي لما بتبقي عنيفة ومسيطرة " ومن هنا كان بداية الهم اللي عيشته مع جوزي ".

جوزي عايزني أبقي أنا الراجل في العلاقة الزوجية 

واختتمت الزوجة حديثها :" جوزي طلع مريض وعايز يتعالج مش مصدقة أنه حتي في العلاقة الزوجية بيطلب منه أني أعمل معاه زي ما هو بيعمل معايا وكنت كل ما ارفض طلباته يهددني أنه هيخونني وبيطلعني ست معقدة ومملة لكن أنا ولا ديني ولا تربيتي يسمحولي أني أعيش العيشة دي ولا حتي مشاعري كست وأني ببقي محتاجه أحس أن الراجل اللي أنا عايشه معاه  راجل بمعني الكلمة مش علي البطاقة بس رفعت عليه دعوي خلع في محكمة الأسرة ومستنية اكسبها بفارغ الصبر عشان بقيت قرفانة من نفسي وأنا عايشة مع راجل زي ده ".