عشان يبطلوا ينقلوا الكلام لـ خالتهم.. مأساة زوج: مراتي بتحرق العيال بالشمعة
ADVERTISEMENT
" مراتي وأختها بيكرهوا بعض ولما بتعرف أن العيال حكولها حاجة بتجيب الشمعة وتلسعهم في رجليهم " بتلك الكلمات روي زوج لتحيا مصر داخل محكمة الأسرة عن زوجته وأسلوبها العنيف مع أبناءه لأسباب لا تستدعي كل تلك القسوة مما جعله ينفر منها ويرفع عليها دعوي نشوز في المحكمة لتأديبها .
مراتي وأختها بيغيروا من بعض
بدأ الزوج حديثه لتحيا مصر :" أنا ومراتي متجوزين من 12سنة وعندنا ولد وبنت تؤام عندهم 10 سنين مراتي ليها أخت أكبر منها علاقتهم ببعض ضعيفة من زمان وفي بينهم غيرة قوية بس أنا كنت بحاول دايما أحنن قلب مراتي علي أختها عشان هي تبقي خالة عيالي وعيالي بيحبوها ومتعلقين بيها جدا وبالفعل قدرت أحل بينهم مشاكل كتيرة كانت هتوصل للمقاطعة لحد ما في يوم حصلت مشكلة وقاطعوا بعض من ساعتها ".
قاطعوا بعض بسبب عباية
وتابع الزوج :" في مرة مراتي كانت مسلفة اختها عباية وكانت غالية جدا وهي قالتلها هتاخدها يوم واحد وترجعهالها واليوم ده بقي شهر وشهرين وكل ما مراتي تسألها عليها تقولها في الغسيل لحد ما مراتي حست أنها مش عايزة ترجعهالها وبتعند معاها راحت قالتلها " روحي خلي جوزك يصرف عليكي ويجيبلك هدوم بدل مانتي بتشحتي هدومي ومترضيش ترجعيهملي " راحت مسكوا في بعض وأختها ردت وقالتلها " أشحت منك أنتي ؟ ده أنتي الخير اللي أنتي فيه ده كله بسببي أنا " وطبعا مراتي هنا حست بإهانة من كلامها لأنها حست أنها بتعايرها بالمصاريف اللي كانت بتصرفها عليها قبل الجواز لما كانت مراتي لسة صغيرة وكانت أختها هي اللي بتشتغل ومن وقتها وهما مقاطعين بعض وأكنهم أعداء ".
حرقت العيال بالشمعة عشان يبطلوا ينقلوا الكلام لخالتهم
وأختتم الزوج حديثه :" مراتي فضلت بقالها حوالي سنة مقاطعها أختها حتي في المناسبات مبيسألوش علي بعض والمشكلة أن عيالي بيحبوا خالتهم جدا وأنا أجبرت مراتي أنها تسيب العيال يروحولها وأنهم ملهمش ذنب في المشاكل اللي بينهم وبالفعل ده اللي حصل ومراتي وافقت علي كلامي لكن كانت بتأكد عليهم دايما أنهم لما يروحوا لخالتهم ميفتحوش بوقهم ولا يحكوا أي حاجة عن بيتنا وعن حياتنا والعيال عشان لسة صغيرين كان غصب عنهم بيحكوا حاجات وهما مش واخدين بالهم ومراتي عرفت أنهم بيحكوا وبيتكلموا وبينقلوا أسرار البيت كله وسكتتلهم مرة والتانية لحد ما جابت في مرة شمعة سخنة ولسعتهم بيها في رجليهم عشان يتأدبوا ويبطلوا يحكوا في أسرار البيت تاني ومن وقتها وأنا عيالي نفسيتهم تعبانة وعايشين في رعب من أمهم وهي بدأت تعمل الحركة دي علي الفاضية و المليانة كل ما يغلطوا في حاجة تقوم لسعاهم لحد ما جسمهم كله باظ حذرتها مرة وأتنين عشان تربي العيال بطريقة أحسن من كدة وهي اللي في دماغها في دماغها جيت أنهاردة ورفعت عليها دعوى نشوز يمكن تتأدب وتتقي ربنا في عيالها وتبقي أم حنينة عليهم ".
جوجل نيوز
تطبيق نبض
