«جوزي بيهددني بالقتل وبيقولي أنتي حببتيني فيكي ومش عارف أنساكي» أمال تروي مأساتها مع زوجها
ADVERTISEMENT
"الناس بيتهموني أني بحط لجوزي منوم عشان أطلع أقابل رجالة وتعبت من حياتي معاه" بتلك الكلمات روت أمال داخل محكمة الأسرة لتحيا مصر عن زوجها متعاطي المخدرات الذي تزوجها وهي في عمرها السادس عشر لتعيش معه سنتين مليئتين بالقسوة والعنف منه ومن زوجة أبيه التي كانت تتعمد إلحاق الأذي بها وبالطفل التي كانت تحمله في بطنها لتقرر الزوجة ترك له المنزل ورفع دعوي خلع للانفصال عنه نهائيا ".
اتخطبت لجوزي وأنا عندي 15 سنة
بدأت أمال حديثها :" أنا وجوزي كنا عايشين قصة حب لمدة سنة وأنا كان عندي وقتها 15 سنة لحد ما اتجوزنا وحملت علي طول في ولد وعيشت مع جوزي سنتين كانوا من أصعب سنين حياتي كل الحب اللي كان بيننا قبل الجواز اختفي وبقي بيعاملني علي أني الخدامة بتاعته وزاد كل ده لما اكتشفت أنه بيتعاطي مخدرات وكان مخبي عليا أنه بقي بيشربها من ساعة ما أتلم علي أصدقاء السوء اللي شجعوه علي ده ".
كنت فكراه حشيش طلع استروكس
وتابعت:" جوزي أمه متوفية وعايش مع مرات أبوه اللي كانت بتكرهني ولما عرفت أني حامل كانت بتحطلي الشطة في الأكل والصابون علي السيراميك عشان أقع وأسقط الطفل اللي في بطني وجوزي بدل ما يدافع عني ويحميني منها كان هو كمان بيضربني وبيبهدلني علي أتفه الأسباب زي أنه لو لقي السيجارة مش جنبه ينزل فيا ضرب ويقولي أنتي اللي خدتيها وهو أصلا بيبقي شاربها وناسي بسبب " الأستروكس " اللي بيتعاطاه واللي كنت فكراه " حشيش " في الأول كان مبوظ دماغه ومدمر حياتنا واللي اكتشفته أنه بقي بيشربه ومدمن عليه بعد الجواز وكان مخبي عليا واكتشفت ده لما كنت قاعدة معاه في مرة وجتله رعشة في جسمه كله ووقتها مرات ابوة قالتلي اعمليله ماية بملح وهو هيبقي كويس وأنا لما اتخانقت معاه وقتها أنه لازم يبطل وإلا هيجراله حاجة مرات أبوه قالتلي " ملكيش دعوة هو راجل وحر يشرب مخدرات زي ما هو عايز ".
الناس اتهموني أني بحطله منوم عشان أطلع أقابل رجالة
واستكملت :" أقنعت جوزي أنه يبطل مخدرات وكان لازم عشان يبطل ياخد منوم لمدة 15 يوم عشان المادة دي تخرج من جسمه كله وقتها نزلت أنا أشتغلت مكانه عشان أعرف أصرف علي البيت وعلي أبني وبدل ما مرات أبوه تسندني وتقف جنبي سوءت سمعتي وراحت قالت للناس كلها أني بحط منوم لجوزي عشان أطلع أقابل رجالة من وراه ".
اتهمني أنه هيقتلني وقالي يأما هموتك أو هموت نفسي
واختتمت :" جوزي بسبب عمايله سيبتله البيت وطلبت منه الطلاق وهو مرضيش يطلقني وبقي بيهددني بالقتل وقالي " أنتي حببتيني فيكي وسيبتيني ومش عارف انساكي وعشان كدة يأما هموتك يأما هموت نفسي " وأنا من وقتها مش عارفة أخرج من بيتي وخايفة يأذيني أو يخطف أبني مني وعشان كده جيت المحكمة أرفع عليه دعوي خلع عشان أرتاح منه واعيش الباقي من عمري لأبني اللي ملوش ذنب في أي حاجة بتحصل ".
جوجل نيوز
تطبيق نبض
