" جوزي بيعايرني أني مبخلفش وجابلي ضرتين عيشهم معايا في بيتي " ..مأساة زوجة

" أتجوز عليا أتنين وعيشهم في بيتي وخلاني أخدمهم وأبقي تحت رجليهم " بتلك الكلمات روت زوجة لتحيا مصر من داخل محكمة الأسرة عن زوجها الذي تخلي قلبه عن المشاعر والرحمة وقام بإذلال زوجته وتسخيرها لخدمة زوجاته الجدد الذي تزوجهم عليها لعدم قدرتها علي الأنجاب .

تحيا مصر 

جوزي كان زي الملاك معايا لحد ما عرف أني مبخلفش 

بدأت الزوجة حديثها لتحيا مصر :" جوزي كان كويس جدا معايا  قبل الجواز وفي أوله وكان بيتمنالي الرضا أرضا وهو ووالدته كانوا مستننين اجيبله طفل يفرح بيه بأي شكل لانهم صعايدة والخلفة بنسبالهم هي رقم واحد لحد ما عدا وقت واتأخرت في الحمل وبدأوا يشكوا في عدم قدرتي علي الخلفة وعشان يقطعوا الشك باليقين جوزي وداني عند الدكتور عشان نكشف وهناك عرفنا الخبر اللي كسر قلبي ودمر حياتي ".

جابلي ضرتين وخلاني خدامة تحت رجليهم

وتابعت الزوجة :" أول ما عرفنا من الدكتور أني عندي مشكلة في الأنجاب أتغير معايا 180 درجة وأتحول لشخص تاني أنا معرفهوش هو وأهله أستحملت معاملته الصعبة ليا لحد ما الموضوع أتطور ووصلت بيه أنه أتجوز عليا أتنين وجابهم يعيشوا معايا في بيتي وبقي بيعاملهم أحسن مني ويقولي " هما هيعرفوا يجيبولي عيال لكن أنتي ست ناقصة " وبقي بيخرجهم ويفسحهم ويخليني انا أخدمهم ليل نهار ".

أهلي رفضوا يطلقوني منه وقالولي محدش هيرضي بيكي 

وأختتمت الزوجة حديثها :"حاولت كتير بعد إهاناته ليا والعيشة الصعبة اللي عيشتها معاه أني أطلب الطلاق لكن أهلي منعوني أني أنفصل عنه وقالولي " أستحملي عيشتك عشان لو طلقك محدش هيرضي بيكي هتبقي ست مطلقة وكمان مبتخلفيش " والكلام ده زود كسرتي أكتر وأكتر وبقيت عايشة في بيتي وحاسة أني غريبة عايشة من غير روح  ولا عارفة أحس بحنية أهلي ولا عارفة أحس بحنية جوزي عليا وكمان هعيش عمري كله محرومة من الأمومة لكن لأول مرة خالفت كلام أهلي وعملت اللي أنا شايفاه خير لمصلحتي ووكلت محامي يرفعلي قضية خلع ومش عايزة منه أي حاجة غير أن ربنا يجيبلي حقي منه وحق القهرة اللي عيشني فيها وربنا يعوضني خير من عنده ".