سوسن بدر عن والدتها: دورها في الخالة أمونة محدش يعرف يعمله.. وكانت بتمشي في البيت تقول شعر

تحدثت الفنانة سوسن بدر عن حياتها مع والدتها الفنانة آمال سالم، وتنشأتها منذ الصغر، وذلك خلال حوارها ببرنامج معكم منى الشاذلي، عبر شاشة قناة cbc.

تحيا مصر يرصد لكم تصريحات سوسن بدر في برنامج معكم منى الشاذلي

سوسن بدر ووالدتها آمال سالم

وقالت عن والدتها الشهيرة بدور الخالة أمونة: كنت بروح المسرح كتير مع آمال سالم، وهي كانت قمر ورهيبة، يمكن دور الخالة أمونة دي أقرب حاجة ليها عشان صعيدية، وكانت طيبة خالص مش غضوبة.

وأردفت: وهل في حد يعرف يعمل دورها بالطريقة دي؟ وهي خريجة معهد ومن أوائل الدفعات اللي دخوله وأستاذ حسن يوسف دفعتها، ووالدي بردو من المعهد وخريج نقد، وكانت بتحب أحمد شوقي وبتمشي في البيت تقول شعر، ومكنش أبويا راضي ادخل المعهد خوفًا عليا من تعب الفن.. وكنت حافظة مصرح كليوباترا كلها، وأنا صغيرة.

سوسن بدر وعرض الأزياء

وقالت سوسن بدر: قضيت 2 و3 ثانوي في عروض الأزياء، وعلاقتي بدأت مع رجاء الجداوي من لما كانت أشهر وأجمل عارضة، وكانت نموذج.

وتابعت: مدربتناش ازاي نمشي؟ دربتنا ازاي نقعد ونتكلم، عشان العارضة دي ست لازم يبقى ليها شكل، واتعملت منها حاجات مديونة ليها لحد دلوقتي، كنت بدي الفلوس لوالدتي.

سوسن بدر وتفاصيل تحضيرها لأعمالها الفنية

وتحدثت سوسن بدر في الحلقة ذاتها عن تفاصيل تحضيرها لأعمالها الفنية: ببقى خايفة مع كل دور بيجيلي وكل اول يوم تصوير بيبقى رعب، ولما بيتعرضلي شغل مبعرفش اتفرج ولحد دلوقتي، وببقى خايفة الناس تشوفني، بحب اشتري بقالتي وحاجتي وبعتبر ان اللي هيتقال بنسبة اكبر يبقى هو ده الحقيقي.

وتابعت: اما لوافق على شغل بيبقى مهمة مقدسة وببذل فيه مجهود حتى لو كان بطولة، انشالله لو جملة أو مشهد، اتعلمت من استاذ نور ومحمود ياسين وعادل إمام.

سوسن بدر والمسرحيات في مسيرتها الفنية 

وحينما سألتها منى الشاذلي عن تفاصيل مسرحياتها، قالت: ليا مسرحيات مبتتعرضش مع إنها حاجات مهمة، واتصورت في مسرحيات، واعتقد انها موجودة في المركز القومي للمسرح، وعملت مسرحية الطيب الشرير مع الدكتور يحيى الفخراني.

وأضافت عن مشاركتها في مسرحية الواد سيد الشغال: انا اللي بدأتها، وهو الدور اللي عملته بعد كده مشيرة وساعتها جالي حصوة في الكلى وكان لازم ارجع القاهرة لظرف طبي طارق، وجت مشيرة أنقذت الموقف، واتصورت بيها وعملته لذيذ أوي.