مخرج كبير اختاره.. لبلبة تكشف سبب تسميتها بهذا الأسم

كشفت الفنانة لبلبة عن تفاصيل تسميتها بهذا الأسم، ومن كان له الإختيار في ذلك منذ دخولها الفن وهي في عمر الطفولة. 

تحيا مصر يرصد لكم تصريحات لبلبة عن تسميتها بهذا الأسم 

موقف الحظ في طفولة لبلبة 

حكت لبلبة الموقف الذي جعلها في مرمى أنظار المخرجين والمنتجين، الذي كان في طفولتها، قائلة: ولما كان عندي ٥ سنين والدتي والعيلة كانوا رايحين مسابقة للهواه، ومكنتش للأطفال بس للكبار، لكن بمجرد ما سمعت مزيكا وطلعت فوق ترابيزة وكان في أوبيرچ الأهرام، ورقصت وعملت حركات راحوا ادوني الجايزة الأولى.

وتابعت لبلبة: كان موجود وقتها الاستاذ نيازي مصطفى المخرج الكبير، والاستاذ أبو السعود الإبياري، وجه نيازي لوالدتي وقالها لو موافقة إن الطفلة دي تشتغل في السينما خدي الكارت بتاعي وتجبيها عشان اشوف هتقدر تمثل ولا لا. 

لبلبة: المخرج نيازي مصطفى قالي أنتي زي اللبلب

وأضافت: أمي لبستني وحطتلي شريطة حمراء وروحت على الشركة ولما شافني قالي اسمك ايه يا حلوة، قولتله نينو وأنا سعيدة باسمي، قالي نينو! روحت قولتله حضرتك انت اختارت اسمك؟ ف بص لأبو السعود الإبياري وقاله ايه دي عاملة زي اللبلب، فـ سموني لبلبة. 

لبلبة: اهلي كانوا فاكرين هشتغل فيلم واحد وانا صغيرة 

وأردفت: وأمي قالتلي احنا كنا فاكرينك هتشتغلي فيلم ونفرح بيكي انك شغالة في السينما وخلاص، ومكنش حد يتصور ابدًا ان بعد "حبيبتي سوسو" يجيلي بسرعة فيلم اسمه "البيت السعيد" للمخرج حسين صدقي والفنانة ماجدة، وبعد كده كان أنور وجدي بيدور على طفلة جديدة عشان يقدمها وحسن الصيفي كان مساعد ليه وقاله في بنت بتشتغل في اسكندرية قال اسمها لبلبة.

تكريم لبلبة بمهرجان القاهرة 

وقالت لبلبة أثناء تكريمها: انا بشكروا وبحبكوا اوي وبشكر بلدي مصر ووزيرة الثقافة الدكتورة نيفين الكيلاني وحسين فهمي وبشكر جمهوري اللي شجعني وأنا طفلة ولغاية اللحظة اللي بكلمكوا فيها.
وتابعت: بشكر كل اللي اشتغلت معاهم من ممثلين وسيناريست ومخرجين وعمال اللي اتربيت في وسطهم بشكرهم أوي.

وأضافت: وبشكر كل زمايللي اللي فيه بيني وبينهم عشرة طويلة جدًا وبحبهم وهما كمان بيحبوني.

واستكملت: دايمًا لما ببص في الكواليس كنت بلاقي والدتي بتشجعني ومفيش مرة طلعت على المسرح ووالدتي مكنتش واقفة في الكواليس هقولكوا حاجة لما  كانوا بيعلنوا عن مهرجان القاهرة السينمائي كانت والدتي تقولي يا نونيا انتي هتتكرمي المرة دي ومش بيبقى فيه نصيب والسنة اللي بعدها  تقولي أنتي هتتكرمي المرة دي أنتي أكتر واحدة اشتغلتي واسمعي كلامي هتتكرمي ومش بتكرم.

وتابع باكية: دلوقتي أنا بحققلها أمنية هي مش موجودة وأنا بتكرم أنهاردة.

وأضافت: والدتي كانت حامل فيا وبتتفرج في السينما على فيلم وجالها وجع الولادة وبسرعه لحقوها ولو مكنتش اتلحقت كنت هتولد في السينما واللي حصل حاجة غريبة جدا كان يوم زي أنهاردة اتولدت.