أؤمن بالحسد.. تصريحات قوية لـ حسين فهمي ببرنامج حبر سري

فجر الفنان المصري الكبير حسين فهمي عدد من التصريحات النارية خلال حلوله ضيف على برنامج حبر سري المذاع عبر قناة القاهرة والناس من تقديم أسما إبراهيم.

ويرصدها تحيا مصر في السطور التالية:

- عمرنا ما اختلفنا أنا وعادل إمام، واحنا بنحب نلاعب بعض زي القط والفار وبنهزر مع بعض في التصوير باستمرار.

- بسأل على عادل إمام، علطول وبكلم رامي ابنه وهو كويس وإن شاء الله دائمًا كويس، وسبب عدم شغلنا 25 سنة مع بعض لأن مكنش في عمل يجمعنا.

- أنا مش زعلان من حد ومحدش قالي أنا زعلان منك ومفيش في ذهني حد أنا مزعله أو زعلان منه وأنا متصالح مع نفسي.

- نصحت مصطفى أخويا في أزمته مع طليقته، وكنت معه باستمرار وقُلت له حاجات من تجاربي الشخصية، والمنظر مكنش حلو وكان سيء ومكنتش حابب اللي حصل بينهم.

- أؤمن بالحسد لأنه ذُكر في القرآن.. واسمي الفني حققته في سنوات وأعمال طويلة.

- انتصار حرب أكتوبر حسيت فيه أني بأخذ بثأري ومكان تصوير فيلم الرصاصة لا تزال في جيبي، والظروف اللي مرينا بيها ومنطقة القناة اللي كلها كانت مدمرة وربنا يحمي بلدنا

بحرص على انتظار مسلسل كريم عبد العزيز كل سنة، وأبوه أخويا وكنا زملاء ديسك مدرسة وكريم اتولد على إيدي.

- عادل إمام أسطورة ونجيب الريحاني أسطورة ويوسف وهبي اسطورة وطلعت حرب الذي أنشأ بداية السينما المصرية أسطورة واللي بيقيم الناس.

وكان قال الفنان حسين فهمي: "الزوج لازم يقوم بدور الأب مع زوجته، والزوجة تقوم بدور الأم مع زوجها، لأننا دايمًا بنبحث عن آبائنا اللي ربونا في طفولتنا وعشنا معاهم لسنوات طويلة".
 

تصريح لقاء سويدان

وأضاف خلال لقائه ببرنامج "حبر سري" الذي تقدمه الإعلامية أسما إبراهيم بقناة "القاهرة والناس": "لو الزوجة غلطت لازم أتعامل معاها كأب لأن الأب أحاسيسه أجمل وأحن بكتير من الزوج".

وتابع: "مضايقنيش تصريح طليقتي لقاء سويدان لما قالت كنت بحس أنه زي أبويا أكتر مش جوزي، وده إحساس جميل جدًّا إحساس الأبوة، وهي اتربت من غير أب فكنت بالنسبة لها الأب والزوج".

وعن واقعة التنمر على صورة الفنانة ميرفت أمين، علق: "هي كانت رايحة عزاء فمش متخيل الناس تعلق تعليقات سخيفة عليها، وهي إنسانة طبيعية وحزينة، والحزن على كل حال بيغير في ملامح الوجه، مفهمتش التريند السخيف عليها".