عفاف شعيب عن حرمانها من الأمومة: ربنا عوضني بولاد اخواتي.. وبطلت تبني

تحدثت الفنانة عفاف شعيب عن شعورها بعد هذه الفترة الكبيرة بدون أطفال، وذلك خلال لقائها ببرنامج واحد من الناس مع عمرو الليثي.

تحيا مصر يرصد لكم تصريحات عفاف شعيب عن حرمانها من الشعور بالأمومة

عفاف شعيب: ربنا عوضني بولاد اخواتي 

وقالت شعيب: مش حزينة اني انحرمت من الامومة، وربنا عوضني بولاد اخواتي، وكنت في الاول خالص لاقيت الدنيا خدتني وجت كده ومش قراري عشان الظروف المحيطة بيا ومكنش عندي وقت. 

وتابعت: وكنت حابه اكون متواجدة ومشهورة، حسيت اني عندي امبراطورية من الاولاد من المكفوفين، المعاقين، وبطلت تبني.

عفاف شعيب عن أخر أيام أحمد زكي 

وقد تحدثت شعيب تفاصيل الفترة الأخيرة قبل وفاة أحمد زكي، وقالت: قبل ما يعيا العيا الكبير جاني البيت وقالي انا هعمل حليم قولتله انا عارفة انك بتحبه بس هتعمله ليه؟ عشان ساعتها حسيت بحاجة جوايا انه مش هيكمل لما يعمل الدور ده، لأنه كان عاشق للسادات وجمال وحليم، قولتله بلاش قالي لا هعمله. 

وأضافت: وبعدين عيي وتعب وبقى يكلمني من المستشفى وروحتله ٣ مرات، وكل ماروح الاقي ناس مالهومش لازمة ولا كان بيحبهم وبيقولي فارضين نفسهم عليا، لما توفى كنت بتكرم في اليمن، واخويا قالي الخبر قولتله لا متقولش كده، وساعتها عملوا عزاء كبير وخدت العزاء أنا وأخويا.

عفاف شعيب: أحمد زكي كان بيصعب عليا 

وتابعت متحدثة عن الراحل أحمد زكي: كان أخ وبيصعب عليا وطيب، وكان في ناس كتير بتنبذُه، وواحد من الاساتذة الكبار قالوله انت هنا بتهبب ايه روح اشتغل في ورشة، وهو كان بيروح يقعد على جنب وبيعيط. 

وأضافت عفاف شعيب: وبقول احمد زكي موهوب، واحنا في سنة اولى كنت لما اروح الكافيتريا بعزمه على سندوتشات، ولما بدأت اراقبه لاقيته غلبان اوي وقاعد لوحده، ساعتها صعب عليا اوي، وقولتله اقعد معانا جه وقعد يعني موعود، راح غناها كاملة كأن عبد الحليم حافظ جوا ودانك. 

عفاف شعيب في حكاية واحد في المية 

وكانت آخر أعمال الفنانة عفاف شعيب هو مسلسل زي القمر، حيث شاركت في حكاية واحد في المية، وكانت من بطولة صابرين، عفاف شعيب، الفنان مدحت صالح، والعمل من تأليف نداء الشندويلي وإخراج أحمد شفيق.