أحمد سالم عن منعه من الغناء في الأوبرا: ممكن ربنا شايل لي حاجة أحسن

تحدث الفنان أحمد سالم، الشهير بالمطرب النقاش، عن كواليس منعه من الغناء في دار الأوبرا المصرية بحفلة المطربة السورية أصالة نصري ضمن فعاليات مهرجان الموسيقى العربية.

تحيا مصر يرصد تعليق المطرب النقاش على قرار منعه من الغناء بدار الأوبرا

حيث قال أحمد سالم في مداخلة هاتفية له ببرنامج “أخر النهار” مع المذيع محمد الباز: "بعد الاتفاق مع مكتب الفنانة أصالة على معاد البروفات حضرت البروفة جوا الأوبرا، لكن فوجئت قبل الحفلة بمكتب أصالة يبلغني بوجود مشكلة".

وتابع أحمد سالم: "روحت للأوبرا يوم الأربع اللي فات على يوم الحفلة، وقابلت شخص مش عايز أقول اسمه، وقال إنه غير مصرح ليا بالصعود على مسرح الأوبرا، عشان متمش الإعلان عني، والمهرجان هيبقى بحضور وزيرة الثقافة وشخصيات كبيرة، وكان المفروض يتم إبلاغ الأوبرا من بدري، بحيث نكون ظبطنا حاجات".

منع أحمد سالم من الغناء في الأوبرا

وأضاف أحمد سالم في حديثه: "اللي فهمته إن الفنانة أصالة مكانش عندها خلفية إنه لازم يكون في تصريح، وفي الأول والآخر ده نصيب، وممكن ربنا شايل لي حاجة أحسن".

كما كشف أحمد سالم عن تفاصيل تعاونه مع الفنانة أصالة، حيث قال: “جالي مكالمة من مكتب الفنانة أصالة، وطبعا شرف كبير ليا أطلع جنب فنانة كبيرة زي أصالة، وقبل الحفلة بيوم المكتب بعتلي إستايليست عشان بدلة المسرح وخدت مقاس الجزمة وكله تمام، وكنت مؤهل للصعود على المسرح مع أصالة”.

حلمي بكر ومنع أحمد سالم من الغناء بالأوبرا

ومن جانبه، نفى الموسيقار والملحن حلمي بكر كل ما تم تداوله بشأن منعه للمطرب النقاش أحمد سالم من الغناء في حفلة المطربة أصالة نصري بـ دار الأوبرا المصرية.

حيث قال حلمي بكر لـ برنامج “ET بالعربي”: “أنا لا منعت ولا حاجة، تقاليد الأوبرا مش أي حد يعمل أي حاجة ويضيف مطرب وأنت ما سمعتوش في حفلة قبل كده، على أي أساس اجيب شخص لا يمارس المهنة  بمهرجان .. يا جماعة أنتوا بتدافعوا على الغلط ولا أيه”.

وأضاف حلمي بكر: “افرض حصل أي خطأ على المسرح يبقى إيه، مين المسؤول؟ إيه الفوضى اللي إحنا فيها دي، الأوبرا مش حتقبل.. دا غير حفل تجاري”.