مأساة مروة أمام محكمة الاسرة : جوزي بيوهم البنات أنه هيشغلهم عنده في الشركة وبعدين يكتب عليهم ورقتين عرفي ويرميهم

" جوزي ضحك علي بنات كتير وظلمهم وبقيت كارهة حياتي معاه " بتلك الكلمات روت مروة لتحيا مصر من امام محكمة الأسرة عن زوجها الذي أوهم فتيات كثيرة بالعمل والزواج ثم بعد أن ياخذ منهم مراده يقطع صلته بهم ".

تحيا مصر

جوزي غني ووسيم وأي بنت بتتمني يكلمها 

بدأت مروة حديثها لتحيا مصر :" أنا وجوزي متجوزين من 6 سنين وعندنا ولدين وهو علي مدار السينن دي كلها كان في نظري زوج مثالي وكان مخليني مش محتاجة حاجة ولا أنا ولا أولادي ربنا موسع في رزق جوزي ومديله شركة كبيرة وهو يبقي مديرها ده غير أنه وسيم وجذاب وأي بنت بتتسحر بيه وبيتمني يكلمها وخصوصا البنات الشابة دايما بيلاقوا فتي أحلامهم ف جوزي لكن هو عشان كان مديني الأمان أنه بيحبني وعمره ما هيخوني كنت انا ببقي مطمنة مصدقة كلامه عشان بحبه ".

زوج أمام محكمة الأسرة :« مراتي بتخلي صحابها البنات يكلموني عشان تختبر حبي ليها»

"جوزي ضربني علي دماغي بالعصاية عشان خدت منه 10 جنية" مأساة أسراء أمام محكمة الأسرة

نظرتي لجوزي أتغيرت لما بنت كلمتني وقالتلي أن جوزي دمرلها حياتها 

وتابعت مروة من امام محكمة الأسرة:" في يوم كنت قاعدة مع اولادي وجتلي مكالمة من بنت عندها 25 سنة وكانت منهارة وبتبكي ولما سألتها أنتي مين وجيبتي رقمي منين حكيتلي اللي قهر قلبي وخلاني اتصدم في جوزي اللي كنت شايفاه نعمة من ربنا ليا قالتلي أنها عرفت جوزي لما راحت تقدم علي شغل في الشركة عنده وأنها وقتها عجبته وفضل هو يحاول معاها أنه يقرب منها ويقولها أنه حبها من اول لحظة شافها فيها وهي بالفعل أنجذبتله ووقعت في شباك وسامته وطريقته الحلوة وشخصيته القوية ودخلوا في قصة حب لحد ما في يوم طلب منها يتجوزوا عرفي ولو وافقت هيمسكها منصب أداري في شركته عشان تفضل جنبه علي طول لكن لما سألته لية منتجوزش رسمي قالها عشان خاطر عيالي ومراتي ممكن تعملنا مشاكل هنتجوز عرفي كام شهر وبعدين هيقلب جوازنا رسمي لما الظروف تسمح وأنا علي الأساس ده وافقت لكن مجرد ما وافقت أتبسطله معايا أسبوع وبعدها طلقني ورفدي كمان من الشركة وعملي بلوكات وانا دلوقتي حياتي أتدمرت ومستقبلي أتدمر بسببه ومع الوقت لما خليت ناس تبعي تسأل عنه عرفت انه عمل كدة في 100 بنت غيري وعشان كدة قررت افضحه وأكلمك أقولك كل عمايله السودة لأني عارفة أنك نقطة ضعفه انتي وأولادك".

خليت البنت تبعتلي أثباتات ورفعت عليه قضية خلع 

وأختتمت مروة من امام محكمة الأسرة :" طلبت من البنت دي أنها تبعتلي أي أثباتات وبالفعل بعتتلي وروحت بيهم المحكمة رفعت عليه دعوي خلع وفي الوقت ده كنت واجهت جوزي أني عرفت كل اللي هو بيعمله من ورايا وأنه راجل منافق وخاين لكن هو عشان خاف أحرمه من عياله وخاف أنه يبقي في نظر الناس راجل مراته خلعاه حاول معايا بكل الطرق انه يرجعني وانه يقنعني أنهم بنات بيرموا بلاهم عليه مش أكتر لكن أنا للأسف كنت خلاص معايا الأثباتات اللي تخليني مصدقش كلامه تاني مهما قال ومش بدعي في قلبي غير أن ربنا يجيبلي حق قهرة قلبي منه وحق كل بنت ضحك عليها ودمر حياتها ".