زوج أمام محكمة الأسرة :« مراتي بتخلي صحابها البنات يكلموني عشان تختبر حبي ليها»

" كل يوم ألاقي واحدة بتكلمني وبتبعتلي صورها لحد ما أكتشفت أنهم صحاب مراتي وهي اللي بتخليهم يكلموني " بتلك الكلمات روي زوج لتحيا مصر من امام محكمة الأسرة عن زوجته التي تعطي رقمه لأصدقاءها الفتيات ليتقربوا منه وتختبر هي مدي حبه إخلاصه لها .

مراتي طول الوقت حاسة أني مبحبهاش 

بدأ الزوج حديثه لتحيا مصر :" أنا ومراتي متجوزين من 3 سنين وعندنا بنت مراتي بدأت مع الوقت تحس أني بهملها ومش بهتم بيها زي الأول بالرغم أن دي مش حقيقة وأن مكانتها في قلبي بتزيد وأن كل القة أني بنشغل في شغلي طول اليوم عشان أقدر أوفرلها هي وبنتي كل اللي هما محتاجينه لكن هي مش بتقدر ده وبتتهمني طول الوقت اني متغير معاها وأني مبقيتش زي الاول وان في واحدة تانية دخلت حياتي وبعدتني عنها ".

فضلت 3 شهور بلاقي كل يوم واحدة بتكلمني وتبعتلي صورها 

وتابع :" مراتي لما شكوكها فيا زادت طلبت من صحابها البنات ان واحدة فيهم ورا التانية تكلمني وتبعتلي رسايل حب ورسايل فيها صورها عشان تشوف أنا هخونها ولا لا لكن أنا الحمدلله راجل بتقي الله في بيتي وكل مرة كنت ألاقي احدة بتكلمني وبتطل تقابلني كنت بعملها بلوك حتي لو كانت ملكة جمال وفضلت في الحال ده 3 شهور بيجيلي رسايل واتصالات من بنات معرفهاش وكل ده وأنا مش فاهم مين دول وجابوا رقمي منين لحد ما فهمت أية اللي ورا القصة دي ". 

سمعت مراتي وهي بتكلم واحدة من صاحباتها بليل وبتديها رقمي 

وأختتم :" في مرة كانت مراتي سهرانة وأنا كنت  نايم في الأوضة لوحدي ولما صحيت الفجر سمعتها وهي برة و بتكلم واحدة من صاحباتها وبتمليها رقمي وبتطلب منها تكلمني عشان تشوف هتعرف توقعني ولا لا وقتها طلعت من الأوضة فورا وزعقت فيها وقولتلها " بقي أنتي اللي كل يوم تبعتيلي وواحدة تكلمني وماشية توزعي رقمي علي الستات اللي تعرفيها " لكن هي ردت عليا وقالتلي " كنت عايزني أعمل أية وانا شايفاك كل يوم بتتغير معايا عن اليوم اللي قبله وحاسة أنك بتخوني " والكارثة أنها بالرغم من أنها اتأكدت أني صديت كل الستات اللي كلمتني ومع ذلك لسة بتشك فيا لحد انهاردة ومعيشاني في نكد وده اللي خلاني قررت أنفصل عنها وامشي في أجراءات طلاقنا لأنها ست معندهاش ثقة في نفسها ولعبت كل الألاعيب عشان توقعني وتطلعني خاين بدل ما تقدر تعبي عشانها وعشان بنتي ".