الأم المفترية.. مأساة محروس:"عيالي بيكرهوا أمهم ولما قررت أتجوز عليها عملتلي عاهة في عيني"

"تعبت من عصبيتها وطبعها الحاد ولما قررت أتجوز عليها عملتلي عاهة في عيني" بتلك الكلمات روي محروس لـ تحيا مصر محروس من أمام محكمة الأسرة عن زوجته التي تسببت له في جروح في العين عندما علمت بقراراه بالجواز عليها. 

"جوزي طلع متجوزني عشان يقرب من أختي".. مأساة زوجة أمام محكمة الأسرة

"جوزي خلى بنتي ترقص علي التيك توك عشان تجيب فلوس".. منار تنهار أمام محكمة الأسرة

أتجوزت مراتي وكنت عارف أنها عصبية 

بدأ محروس حديثه لتحيا مصر:"أنا أتجوزت مراتي وانا عارف أنها عصبية بس كنت فاكر أنها بعد الجواز هعرف أغيرلها طبعها ده وأتحكم فيه لأني كنت بحبها ومتمسك بيها  لكن مع الأسف طبعها ده أزداد سوء خصوصا بعد ما جيبنا أطفال أحنا عندنا ولدين وبنتين أكبر ولد فيهم عنده 22سنة ودايما بشوف عيالي وهما نفسيتهم تعبانة بسبب غضب أمهم عليهم طول الوقت بس كنت بحاول علي قد ما أقدر أني أديهم أنا الحنان اللي هما مش لاقيينه من أمهم". 

عيالي قالولي أحنا نفسنا في ماما جديدة 

وتابع محروس :"في الفترة الأخيرة بقيت الاحظ ان عيالي بيطلبوا مني يروحوا عند امهات أصحابهم كتير عشان بيهتموا بيهم اكتر من امهم اللي طول الوقت بتزعقلهم وتضربهم علي أتفه الأسباب وتجرحهم قدام صحابهم ده غير انها حارماهم من كل حاجة في الدنيا ومش مديالهم أي وقت يحسوا فيه بطفولتهم  وأنا مهما بحاول أصلح ده بصفتي أبوهم فكنت برضه غصب عني بقصر أوقات كتير بسبب أنشغالي في الشغل لحد ما في مرة عيالي قالولي " أحنا نفسنا في ماما جديدة تلعب معانا ومنخافش منها". 

قررت أتجوز علي مراتي  وكنت خايف من رد فعلها لما تعرف 

واتستكمل :" في مرة كنت بفكر في كلام عيالي ليا ولما حسبتها لقيت ان انا كمان محتاج زوجة تكون حنينة عليا ومطيعة وتخلي عيالي مش ناقصهم حاجة قررت أتجوز وكان في زميلة ليا في الشغل مميزة بهدوءها وتعاملاتها الطيبة مع الناس كلها   فاتحتها في الموضوع أني عايز أطلب أيديها كنت من جوايا خايف من رد فعل مراتي وخصوصا اني عارف أنها مش هتعديها بالساهل روحت أتفدمت لزميلتي في الشغل واهلها وافقوا وقرينا الفاتحة ولأول مرة في حياتي كنت حاسس بفرحة حقيقة ". 

ضربتني في عيني ومبقيتش أشوف بسببها 

وأضاف :"بعد ما قريت الفاتحة قررت أني اخد عيالي معايا يعيشوا مع زوجتي التانية وهي مكنش عندها مشكلة في ده قررت أتكلم مع مراتي الأولي في أننا لازم ننفصل وأن خلاص أنا مش هستحمل حياتي معاها تاني وأن خلاص كل شئ قسمة ونصيب وهي لقيتها بتسألني " أنت شكلك شوفتلك شوفة تانية " وأنا قولتلها " اه في واحدة بنت حلال طلبت أيديها وهاخد عيالي يعيشوا معاها وأنا لولا العيشة الصعبة اللي أنتي معيشهاني أنا مكنتش فكرت أبدا في الجواز عليكي " انهارت من الكلام اللي هي سمعته وجاتلها حالة عصبية ومسكت فيا وفجأة لقيتها نازلة عليا بكوباية أزاز في أيديها وضربتني بيها في عيني وقالتلي " وريني هتعرف تتجوز عليا أزاي وأنت بعين واحدة ". 

مش قادر أقول أنها كانت مراتي دي كانت كابوس في حياتي 

وأختتم :" عيني فضلت تنزل دم ولما روحت للدكتور قالي أن الأمل في شفاءها ضعيف جدا مشيت في أجراءات طلاقي من مراتي وهي رجعت عند بيت أهلها عيالي نفسيتهم متدمرة وزوجتي التانية اللي كانت هي أملي الوحيد أن حياتي تبقي أحسن بعد ما شافت اللي حصل في عيني وأن مراتي عملت فيا كدة بقيت بتشاور عقلها ومعرفش هتوافق تكمل معايا ولا لا ندمان أني ضيعت أكتر من 20 سنة مع أنسانة زي دي بس عوضي عند ربنا ".