"جوزي طلع متجوزني عشان يقرب من أختي".. مأساة زوجة أمام محكمة الأسرة

"أنا بقالي 10 سنين عايشة برة ولما رجعت وجوزي أتقدملي أختي خبت عليا أنه كان بيحبها قبلي".. بتلك الكلمات روت زوجة لـ تحيا مصر من امام محكمة الأسرة عن زوجها الذي أتضح أنه كان متخذها وسيلة للتقرب من شقيقتها الأصغر.

"جوزي خلى بنتي ترقص علي التيك توك عشان تجيب فلوس".. منار تنهار أمام محكمة الأسرة

"مراتي عملتلي عمل عشان متجوزش عليها زي ما أمي عايزة".. مأساة مصطفي أمام محكمة الأسرة

عيشت بعيد عن أسرتي 10 سنين وأختي مكنتش أعرف تفاصيل عن حياتها 

بدأت الزوجة حديثها لتحيا مصر:"سافرت وانا عندي 19 سنة، ورحت لعمتي وعيشت معاها وكملت تعليمي في دولة خارج مصر العمر جري بيا وأنا هناك وجريت 10 سنين بحالها وكنت أنا فيهم مش مركزة في حاجة غير في دراستي وشغلي أنا ليا أخت أصغر مني بـ5 سنين  وهي عايشة مع والدي ووالدتي في مصر كنت بطمن عليهم أول بأول علي مدار الـ10 سنين دول لكن أختي للأسف مكنتش قريبة منها كفايا عشان أعرف تفاصيل عنها وعن حياتها وانا بعيدة عنها".

رجعت مصر وأنا 30 سنين واهلي قرروا يجوزوني

 وتابعت :" بعد ما دخلت الـ 30 أهلي طلبوا مني أرجع مصر عشان أتجوز لأني كنت عايشة في بلد كلها أجانب وغرب والجواز منهم صعب جدا وبالفعل مشيت في أجراءات وورق رجوعي مصر رجعت وخلال سنة واحدة كان في عريس متقدملي وأهله كلموا أهلي وكانوا مستنيين ردي وموافقتي وأنا لما سألت أختي عليه من باب أنها ممكن تكون عارفة الناس اللي حوالينا أكتر مني قالتلي:" أنا معرفهوش والقرار يرجعلك " وأهلي كنت ملاحظة أنهم حتي مش مديني فرصة أسأل عنه لأنهم كانوا بدأوا يخافوا من سني اللي بيكبر فكانوا عايزني أوافق بأسرع وقت ".

صديقة قديمة ليا كشفتلي اللي قلبلي حياتي

وأضافت:"وافقت عليه وبالفعل تمت الخطبة و الجواز وخلال شهر بعد فرحنا كنت حامل كان هو بنسبالي شخص عادي كان متقي ربنا فيا ومقدر أني أغلب حياتي قضيتها في بلاد برة ومكنتش حاسة معاه بأي مشاكل لحد ما في مرة قابلتني صديقة ليا من مدرستي القديمة وكنت فرحانة أوي أني أخيرا لقيت حد من دايرة اصدقائي قبل ما أسافر لكن مع الأسف دخولها حياتي في التوقيت ده كان له حكمة من عند ربنا".

عرفت أنه كان بيحب أختي ومرتبط بيها سنتين 

وأستكملت:"صاحبتي دي طلبت مني تقابلني وقالتلي أحنا محتاجين نقعد نتكلم في أسرع وقت وبالفعل أتقابلنا وقالتلي"سامحيني لو اللي هقولهولك ده جه في وقت متأخر بس أنا ضميري ميسمحليش أني أخبي عليكي أكتر من كدة" بدأت هنا أقلق وقولتاها أتكلمي في أية ؟ قالتلي " طبعا أنتي عارفة أننا كنا بعاد شوية أنا وأنتي بقالنا زمن بحكم أني أتجوزت وخلفت وانتي كنت مسافرة برة، وأني معرفتش أخبارك أنك رجعتي مصر وأتجوزتي غير من علي "الفيس بوك" لكن اللي أنا جاية أقولهولك انهاردة أني لما شوفت صورك مع عريسك في الفرح فضلت أشبه عليه لحد ما عرفت ان هو ده الشاب اللي كان مرتبط بأختك لمدة سنتين وهي في الأخر رفضته عشان كان بيزعلها كتير وبيكلم بنات أنا معرفش أنتي تعرفي ولا لا بس أنتي عشان أنسانة طيبة حرام يتضحك عليكي أنصحك أنك تواجهيه عشان لو لسة عنده مشاعر ليها أنتي كدة هتبقي في خطر معاه أنتي وأبنك اللي في بطنك ".

واجهتهم وأكتشفت أن كل كلام صاحبتي حقيقي 

وأختتمت:"في نفس اليوم بعد ما سيبت صاحبتي رجعت البيت وكان جوزي موجود وطلبت من اختي تجيلنا البيت اختي جت و قعدت أنا وهي و جوزي نتكلم في القعدة دي واجهتهم بكل اللي أنا عرفته ومشوفتش علي وشهم غير السكوت وأنهم مكنوش لاقيين كلام يقولوه لحد ما أختي أتكلمت وقالتلي " ده كان زمان أيام المراهقة وأبونا وأمنا ميعرفوش أي حاجة عن الكلام ده وخلاص مبقاش في أي أثر للقصة دي " وجوزي قال " أنا مش هنكر أني في بداية جوزانا ولما طلبت أيدك مكنتش قادر أنسي أختك لكن بعد ما عيشنا مع بعض كل ده أتنسي " مكنتش قادرة أصدق أنهم قدروا يعملوا فيا كدة أستغلوا أني مكنتش عايشة معاهم عشان يضحكوا عليا  قطعت من وقتها أي صلة تجمعني بأختي لحد ما أشوف هقدر أسامحها ولا لا وجوزي رفعت عليه دعوي خلع عشان اللي بقدر يكدب مرة هعيش عمري كله معاه في كدب  واللي جاي من عمري هعيشه لأبني اللي في بطني وبس ".