"مراتي عملتلي عمل عشان متجوزش عليها زي ما أمي عايزة".. مأساة مصطفي أمام محكمة الأسرة

"مراتي حطيتلي العمل جوة الهدوم وتحت المخدة عشان مشوفش ست غيرها ".. بتلك الكلمات روي مصطفي لـ تحيا مصر من امام محكمة الأسرة عن العمل الذي وجد زوجته واضعاه له في أغراضه وملابسه حتي لا يتمكن ويفقد الرغبة تجاة الزواج عليها مرة أخري .

أمي مقدرتش تحب مراتي عشان مكنتش هي اللي مختاراها ليا 

بدأ مصطفي حديثه لـ تحيا مصر من أمام محكمة الأسرة :" مراتي بتحبني حب جنون وانا وهي مكملناش سنة جواز أمي مكنتش موافقة علي مراتي ولا علي الجوازة دي عشان مكنتش هي اللي مختراهالي وأنا امي ست قوية ومبتحبش أي حاجة تتم غير بأختيارها حاولت كتير أقنعها ان مراتي ست طيبة وجدعة وهتاخد بالها مني ومن بيتها لكن اللي في القلب في القلب وبالتالي مراتي كمان لما شافت كل الكراهية دي في قلب حماتها مقدرتش هي كمان تحبها ولا تقرب منها وأنا بدوري كزوج وأبن كنت بحاول أقربهم من بعض علي قد ما أقدر لكن كانت كل محاولاتي بتفشل ".

أمي جابتلي كذا عروسة بعد جوازي وكانت بتزق عليا البنات  

وتابع :" امي لما فقدت الأمل أنها توقع بيني وبين مراتي ونسيب بعض بدأت تزغلل عيني ببنات كتير وتعرض عليا كذا عروسة وتشوف أية اللي ناقص عند مراتي وتجيبلي واحدة وتقنعني بيها أنها هتعوض النقص ده يعني مثلا مراتي شعرها قصير فكانت أمي تعرض عليا بنت شعرها طويل وأصفر وتقولي " بذمتك مش احلي من مراتك .. ذوقك ولا ذوق أمك ؟" ده غير أنها كانت بتدي بنات رقمي عشان يتصلوا بيا ويحاولوا يوقعوني وتقوم هي تروح تقول لمراتي أني بخونها عشان هي تتقهر وتسيبني لكن أنا في كل مرة كانت أمي بتعمل كدة وتوجع فيها مراتي كنت أنا بتمسك بيها أكتر وبقول لوالدتي أن مراتي واحدة بنت ناس وانا مش متجوزها عشان يتعمل فيها كدة ".

مراتي عملتي عمل ولقيته جوة هدومي  

وأستكمل :" مراتي لما شافت أصرار حماتها أنها تطفشها بالشكل ده لجأت لحيلة أفتكرت بيها انها كدة هتحافظ عليا بدأت تدور علي النت وتسأل صاحباتها المقربين أية الطريقة اللي ممكن الست تخلي الراجل بيها يفقد الرغبة في أنه يشوف أي واحدة غيرها ؟ وكانت الطريقة اللي هي وصلتلها من علي النت وبشورة صاحباتها انها تعملي عمل وبالفعل فضلت فترة كانت بتاخد مني فلوس كتير وتغيب عن البيت بالساعات وتقولي كل مرة أنها كانت في مكان شكل ده غير أني كنت بلاقي حاجات بتاعتي تختفي وأجي أدور عليها ملاقيهاش  لحد ما في مرة كنت لابس جاكيت والجاكيت ده فيه جيب كدة داخلي وانا الجيب ده مش بستخدمه خالص من ساعة ما أشتريته لأنه صعب في قفله وفتحه ومراتي عارفة ده بس في مرة يشاء القدر وأبقي محتاج أحط فيه حاجة ضروري ولما فتحته لقيت شئ غريب جدا وملفوف بمناديل ".

أول ما عرفت أن اللي في لبسي ده عمل رميت الطلاق علي مراتي 

وأختتم :" خدت الشئ الغريب اللي لقيته في هدومي ده وروحت سألت ناس صحابي يمكن يفهموني أية دة ؟ عرفت أنه عمل وفورا طلعت علي البيت وواجهت مراتي بس قبل ما أواجهها دورت في البيت كله ولقيت أنها كمان عاملالي واحد تاني تحت المخدة اللي بنام عليها لما واجههتا بدأت تبكي وتنهار وقالتلي " انا عملت كدة عشان خوفت تضيع من ايدي وتمشي ورا كلام أمك وتتجوز عليا " ساعتها من غير ما أفكر رميت عليها الطلاق عشان الست اللي تفكر تعمل لجوزها عمل صعب يتأمنلها تاني وحاليا ماشي في أجراءات طلاقنا وبحمد ربنا أني مكنتش لسة جيبت منها عيال يربطوني بيها ".