تسنيم أمام محكمة الأسرة : جوزي عامل زي العيال وبيعيط لو خسر في ماتش كورة مع صحابه
ADVERTISEMENT
" جوزي بيحب الكورة أكتر مني ومضيع وقته كله عليها".. روت تسنيم لـ تحيا مصر من امام محكمة الأسرة عن زوجها الذي يعاني من هوس ماتشات كرة القدم والتي أصبحت تتحكم بحياته مما جعل زوجته تشعر معه بعدم الراحة ".
جوزي زملكاوي وبيكتئب بالشهر لو الزمالك خسر
بدأت تسنيم حديثها لتحيا مصر:"في الخطوبة جوزي كان مفهمني أنه بيحب الكورة بس مكنتش أعرف أنه مجنون بيها لكن لما أتجوزنا بدأت أكتشف طبعه اللي خلاني ندمت علي جوازي منه جوزي زملكاوي وكل مرة الزمالك يخسر يكتئب ومياكلش ولا يشرب و يحبس نفسه في الأوضه بالساعت ويقفل تليفونه عشان ميردش علي حد وخصوصا صحابه الأهلاوية اللي بيتصلوا بيه عشان يغيظوه ويحرقوا دمه".
وقته كله ضايع علي الكورة ومبقيتش أشوفه ولا أقعد معاه
وتابعت :"مبقيتش أشوف جوزي ولا أتكلم معاه وقته كله وتفكيره وأنشغاله بالكورة وبس أحيانا بما أن ربنا لسة مرزقناش بأولاد بقيت أقضي يومي كله في البيت لوحدي وهو بيبقي في الشغل ولما بيرجع بيقعد لحد اخر الليل في الشارع أو في النادي بيلعب كورة مع صحابه ولما بيروح بليل وأفرح أنه أخيرا رجع الاقيه غير هدومه وقعد قدام التليفزيون عشان يكمل فرجة علي ماتشات الكورة لحد ما ينعس وينام وأنا مليش أي أهتمام ولا وجود في حياته".
بيفضل يعيط زي العيال لما صحابه يهزموه في ماتش كورة
وأستكملت :" في مرة لقيت جوزي راجع من ماتش كورة كان بيلعب فيه مع صحابه وكان متعصب ومش طايق ولما سألته ماله وحاولت أهديه فضل يعيط وقالي أنه خسر في الماتش أنهاردة ومن ساعتها وأنا بقيت حاسة أنه راجل ميتعاشرش وأن دماغه دماغ أطفال وأن يمكن أنا أعقل وأنشف منه ".
أشتكيت لوالدته ووقفت في صف أبنها
أختتمت :" أخر ما زهقت اتصلت بوالدته أشتكيلها يمكن تنصح أبنها وتوعيه وقالتلي:" أبني سيد الرجالة وتلاقيكي انتي اللي مش مريحاه ومنكدة عليه والكورة هي اللي بتنسيه قرفك" وقتها قررت أخلع الراجل ده وجوازي منه حتي ميحتسبش جواز لأن أنا زي أي ست بتمني أني أعيش مع راجل يديني أهتمامه ووقته وتركيزه وأحس معاه أنه راجل راسي وموزون وأملي في ربنا كبير أنه يرزقني براجل زي ده غير اللي أنا أبتليت بيه ".
جوجل نيوز
تطبيق نبض
