عزة في دعوي خلع:"جوزي عملي بلوك و خاربها علي البحر مع الستات في الساحل"

"كل يوم ألاقي قرايبي بيبعتولي صور جوزي وهو مع ستات بالمايوة علي البحر ووشي بقي في الأرض بسببه".. بتلك الكلمات روت عزة لـ تحيا مصر من أمام محكمة الأسرة عن حياتها مع زوجها الذي ذهب إلي رحلة عمل في الساحل وأهمل أحتياجاتها هي وأبناءه حتي قررت خلعه في المحكمة.

قبل الجواز وعدني ياخدني معاه في كل حتة يروحها 

بدأت عزة حديثها لتحيا مصر :"أنا وجوزي متجوزين من سنتين وجيبنا بنت عندها سنة، اتجوزنا بعد قصة حب طويلة وكان مواعدني فيها أن بعد الجواز هياخدني معاه في كل مكان يروحه عشان مش بيقدر يتحمل بعدي عنه وكمان عشان هيخاف عليا يسيبني لوحدي في البيت وهو يبقي بعيد عني ودي حاجة كانت مطمناني ليه عشان هو شغال مهندس وطبيعة شغله بتجبره يسافر كتير وبالشهور وده سبب كان مخلي أهلي مترددين يوافقوا عليه لما جه يتقدملي في البداية بس هو طمني أنا وأهلي أنه مش هيسيبني وعلي الأساس ده وافقوا عليه".

طلبت منه نسافر بعد الجواز وكان بيرفض بسبب بنتي  

وتابعت :" بعد جوازنا قعدنا سنتين كنا مبسوطين مع بعض فيهم لكن في الفترة الأخيرة بعد ما بنتي كملت سنة المسؤولية عليا أنا وهو زادت و بدأ يبقي فيه بيننا الروتين اللي بيبقي بين أي زوج وزوجة كتير كنت بطلب منه نسافر ونغير جو وأهي ميزة أن ربنا كارمنا وظروفنا حلوة ومرتاحين لكن كنت ألاقيه بيرفض ويقولي " أنتي عايزاني أسافر معاكي أنتي وبنتك الزنانة عشان فلوس السفرية تترمي في الأرض ومنعرفش نتبسط هو هيبقي زهق جوا البيت وبراه كمان؟".

سافر الساحل 6 شهور وعملي فيهم بلوك 

وأستكملت :" جتله سفرية شغل للساحل وهتبقي شغل وتغيير جو مع زمايله في نفس الوقت ولما سألته هيرجع امتي قالي " أرجع وقت ما أرجع وأهو علي الأقل أترحم من زنك أنتي وبنتك وأفك عن نفسي شوية "سابلنا مبلغ نمشي بيه أمورنا لحد ما يرجع وانا كان في أعتقادي أنه هيقعد أسبوعين بالكتير ويرجع  يمر شهر والتاني والتالت وكل ما أتصل بيه عشان أطمن عليه وأعرف هييجي أمتي وكمان أطلب منه يبعتلنا مصاريف أنا وبنتي مكنش يرد علي مكالماتي لحد ما فتحت مرة تليفوني ولقيته عاملي بلوك علي الواتس والفيس بوك والمكالمات كمان".

صوره مع الستات علي البحر فضحتني قدام أهلي 

وأختتمت :" وأتفاجئ انه بعد ما عملي بلوك ألاقي أهلي وصحابي بيبعتولي صوره اللي بينشرها علي الفيس وكلها علي البحر ومع ستات لابسين مايوة وأجانب وهو حاضنهم وبيتصور معاهم أتحرجت جدا من أهلي وخصوصا كلامهم ليا لما قالولي " هو ده اللي كنتي بتزني علينا عشان نوافق عليه ؟ خلي وشي في الأرض لا وكمان بيغير جو وينبسط وسايبني أنا وبنتي بناكل بالعافية  لما زاد الوضع بالشكل ده قررت أخلعه عشان أعرفه أن مش أنا الست الل تترمي الرامية دي و عوضي وحقي عند ربنا ".