ساندي في دعوي خلع: جوزي قصلي شعري وضربني عشان رفضت الحجاب

"كان متجوزني وانا بشعري بس كلام الناس قلبه عليا".. بتلك الكلمات روت ساندي لـ تحيا مصر عن صراعاتها مع زوجها المستمرة منذ ثلاث سنوات بسبب " الحجاب "، والتي أنتهت بتعديه عليها بالضرب المبرح وقام بقص لها شعرها، مما جعلها ترفع عليه دعوي خلع أمام محكمة الأسرة بزنانيري.

تحيا مصر

سيدة أمام محكمة الأسرة: جوزي قالي مش هأكلك أنتي وعيالك غير لو أتنازلتيلي عن ورث أمك

البخيل وأنا.. سيدة من أمام محكمة الأسرة: عيالي وقفوا لأبوهم في المحاكم عشان يصرف عليهم

كان متجوزني وراضي بيا وأنا بشعري 
 

بدأت ساندي حديثها لتحيا مصر :"أتجوزنا عن حب وكان معجب بيا وبشعري من أول يوم شافني فيه كان عارف أن شعري بيمثلي جزء كبير من أهتماماتي لأنه طويل وشكله مميز ولما كانت بتيجي سيرة الحجاب بيننا وأحنا مخطوبين كنت بسأله هل في مانع أني أفضل بشعري بعد الجواز ؟  وكان رده أن البنت مينفعش تتحجب عشان خاطر الناس ولازم يكون حجابها  ناتج عن أقتناع تام منها ده غير أنها حرية شخصية ومحدش يقدر يفرض عليكي حاجة ".

كلام الناس وأهله قلبوه ضدي 
 

وتابعت ساندي :" بعد الجواز حاجات كتير أتغيرت، والموضوع أختلف عن لما كنت بنت وفي بيت أهلي، كون أني بقيت مسؤولة من راجل ده خلي كلام الناس ييجي علينا بالسلب، الناس بقيت بتقول لجوزي " مانت لو كان عندك شخصية وراجل مع مراتك كنت حجبت مراتك ومكشفتش شعرها ولبسها المكشوف ده قدام الناس " وأهله كمان كان بيقولوله "هي فاكرة نفسها لسة بنت و عايزة تمشي تتعاكس من الناس ومتعرفش أنها بقيت ست متجوزة ولازم تحافظ علي شكل جوزها قدام الناس ".

ضربني وقصلي شعري وقهرني عليه  
 

وأستكملت :" جوزي من ساعة ما بقي بيسمع الكلام ده، كل مبادئه معايا أتغيرت، وبعد ما كان بيقولي في البداية أن الحجاب ده حرية شخصية، بقي بيقولي يأما تتحجي يأما شعرك ده هحسرك عليه، فضلنا مدة كبيرة علي الحال ده وأنا طبعا كنت رافضة وقولتله أنت راضي بيا من البداية وأنا كدة وملكش الحق أنك تيجي دلوقتي تجبرني علي حاجة , وفي يوم في مشادة كبيرة جدا بيني وبينه ضربني ضرب هستيري وجاب المقص وقصلي شعري وقالي " أنا كان المفروض أعمل كدة من زمان من اليوم اللي جيبتيلي فيه الكلام وخليتي وشي في الأرض من أهلي والناس " من قهرتي علي نفسي وعلي حالي لجأت للمحكمة عشان أخلعه، وعندي أمل القانون يخلصني منه ".