البخيل وأنا.. سيدة من أمام محكمة الأسرة: عيالي وقفوا لأبوهم في المحاكم عشان يصرف عليهم

" أتطلقت من جوزي بسبب بخله عليا وعلي ولادي وكان مشيلني الشيلة كلها "، بتلك الكلمات روت سيدة لـ تحيا مصر من أمام محكمة الأسرة عن حياتها الزوجية التي أهدرتها مع زوجها السابق في مشقة وحرمان وأستغلال منه لوضعها المادي وألاجتماعي المرموق.

تحيا مصر

زوج أمام محكمة الأسرة : طليقتي أستغلت نفقة أولادي وأتجوزت عرفي من ورايا

زوج يستغيث من داخل محكمة الأسرة: مراتي مريضة نفسيا وبتحطلي حبوب هلوسة في الشاي

كنت بمثابة ألام و الأب لأولادي 

بدأت السيدة حديثها لـ تحيا مصر :" أنا مدرسة أنجليزي وفضلت سنين أنا اللي بصرف علي أولادي، رغم أن جوزي شغال في شركة كبيرة ومرتباتها عالية وكويسة جدا، بس هو كان بيضيع كل فلوسه علي أحتياجاته الشخصية ومش عامل أي حساب لبيته ولا لأولاده ".

بيرميلنا شوية فكة 

وتابعت :" أتطلقت منه وسنة ورا التانية ولادي كبروا وأحتياجاتهم زادت، رفعت عليه في البداية دعوي نفقة وأتحكمله أنه يدينا مبلغ معين، بس المبلغ ده كان بمثابة شوية فكة بالنسبة لأحتياجات عيالي، وبالنسبة كمان للمرتب اللي هو بياخده ".

عيالي وقفوا لأبوهم في المحاكم 
 

وأستكملت :" عيالي بعد ما عدوا سن الـ15 سنة ووصلوا لسن الخصومة القانونية , أبتدوا هما اللي يروحوا المحاكم ويتابعوا القضية بنفسهم، عشان يوصلوا  لأبوهم أنهم كبروا ومبقوش صغيرين، وأنهم هيجيبوا منه حق كل لحظة أتحرموا فيها بسببه , سواء في صغرهم لما كان عايش معاهم، أو لما كبروا وأصبحنا أنا وهو مطلقين رسميا ".

قلبي بيتقطع عليهم وهما اللي حاسين بيا 
 

وأختتمت :"قلبي بيتقطع كل يوم من الكلام اللي بسمعه من أولادي , لما يقولولي أنهم بيزعلوا علي نفسهم في كل مرة بيشوفوا حد من صحابهم أبوهم جايبله هدية أو معيشه عيشة مرتاحة، وأنهم كان نفسهم نعيش كلنا أسرة مرتاحة ومستقرة و منشوفش الشفقة في عيون الناس لما يلاحظوا أن أبوهم بعيد عنهم ومش بيسأل عليهم، بس اللي بيفرحني أنهم في سنهم الصغير ده حاسين بيا , وبيقولولي يا ماما أحنا عايزين نكسب القضية و بابا يبعتلنا الفلوس عشان نريحك من المسؤولية اللي عليكي واللي شايلاها سنين، وأنا أملي في ربنا وفي القانون كبير أنه يجيبلي حقي وحق أولادي".