سيدة أمام محكمة الأسرة: جوزي قالي مش هأكلك أنتي وعيالك غير لو أتنازلتيلي عن ورث أمك

" أمي كانت هي سندي في الدنيا وبعد ما ماتت جوزي طمع في ورثها ونفسي  أطلق منه ".. بتلك الكلمات روت سيدة لتحيا مصر عن طمع وجشع زوجها في أمتلاك الورث الذي تركته لها أمها، ولكن حين رفضت الزوجة التنازل له عن الورث، عذبها هي وأطفالها بوسائل عدة ".

البخيل وأنا.. سيدة من أمام محكمة الأسرة: عيالي وقفوا لأبوهم في المحاكم عشان يصرف عليهم

زوج أمام محكمة الأسرة : طليقتي أستغلت نفقة أولادي وأتجوزت بيهم عرفي من ورايا

بان علي حقيقته بعد وفاة أمي 
 

بدأت الزوجة حديثها لتحيا مصر :" جوزي مظهرش علي حقيقته غير بعد وفاة أمي، طول ما هي كانت عايشة كان بيمثل قدامها أنه بيحبني وأنه بيرعاني أنا وعيالي وبيتقي ربنا فينا وأول ما جالنا خبر وفاتها أتحول لشخص تاني أنا معرفهوش عندي منه طفلتين وبعد ما كنت فاكرة أن هو اللي هيبقي سندنا في الدنيا وهيعوضني عن غياب امي أكتشفت أنه بقي حمل علي أكتافي وأتكتب عليا ".

امي كانت شايلالي دهب يوصل للمليون جنية 
 

وتابعت الزوجة :" امي كانت دقة قديمة، وكانت بتحب دايما تحط فلوسها كلها في الدهب كل ما تمسكلها قرشين تروح تشتري بيهم دهب و تشيله  وكانت بتقولي قبل ما تموت أن الدهب ده كله هيبقي ليا أنا وبناتي عشان تبقي حاجة من ريحتها تفضل معانا بعد موتها عشان أنا بنتها الوحيدة وكانت بتقولي متقوليش لجوزك عشان ميطمعش فيكي و سيبي كل حاجة لأوانها وأكن كان قلبها حاسس بكل اللي هيحصل".

حبسني أنا وعيالي عشان أمضيله علي التنازل  
 

وأستكملت الزوجة :" جوزي وصل بيه الطمع أنه هددني يأما أتنازله عن الورث بتاع أمي يأما يحرمني أنا وعيالي من الأكل والخروج لمدة شهر وبعدها هيرمينا من الشارع طلبت  منه الطلاق وأن كل واحد فينا يروح لحاله وأنه يعمل أعتبار أن في أطفال بيننا وحرام يتعمل فيهم كدة، بس رفض وقالي مش هطلقك غير لما أخد اللي وراكي واللي قدامك، ودلوقتي أنا مش بطالب غير أنه اطلق منه لأنه أنسان أناني ومعندوش قلب ولا رحمة ".