طلع أبن أمه ومكنتش باكل غير بأذن حماتي.. مأساة سيدة من أمام محكمة الأسرة بزنانيري

"حماتي كانت بتقولي أنا أبني متجوزك عشان يجيبك خدامة عندي و تحت رجلي"..بتلك الكلمات روت سيدة لـ تحيا مصر تفاصيل الحياة مع زوجها السابق، كما أوضحت أسباب الطلاق والتي تتمثل في خضوعه التام لوالدته، حيث كان يعطي لها الحق في التدخل في كل الأمور المعيشية بينهم كزوج وزوجة،وهذا الوضع لا تقبل به أي امرأة، فقامت تلك السيدة بالأنفصال عنه رسميا وتطالبه في دعوي نفقة بمصاريف الأطفال.

تحيا مصر

مأساة زوجة من أمام محكمة الأسرة: جوزي عنده ميول جنسي و بيحب البنات الصغيرة

خلع ملابسي وقطع جسمي بالكتر.. مأساة زوجة من أمام محكمة الأسرة بزنانيري

حماتي كانت مخلية حياتي جحيم 

بدأت سيدة حديثها لتحيا مصر :" أتجوزنا من 6 سنين وجيبنا بنتين، في بداية الجواز حماتي كانت بتعاملني كويس وده كان مطمني، لكن مجرد ما خلفت كل حاجة أتغيرت، بقيت أنام بأذنها وأكل وأشرب وأخد مصروفي بأذنها، ده غير خدمتي ليها الـ 24 ساعة لدرجة أني كنت بقصر في خدمة أولادي عشان أخدمها هي، وهو كان سامح بده وعمره ما أعترض علي كلامها، لكن أنا وعيالي كنا تعبانين، ولما قررت في يوم أواجهها وأقولها هي لية بتعمل كدة معايا، قالتي أنتي فاكرة أن أبني متجوزك عشان سواد عيونك، ده متجوزك عشان يجيبك خدامة تحت رجلي ". 

ضربني وسحلني علي السلالم 

وتابعت السيدة :" قبل الطلاق بأيام معدودة ضربني وشوهلي وشي وسحلني علي السلالم لما واجهته أني تعبت من العيشة معاه، وهو كان مستقوي بأمه و بأخوه، لأن أخوه كان معيش مراته نفس عيشتي،لأن بأختصار أي واحدة ست تتجوز راجل من العيلة دي لازم تشوف أسود أيام حياتها من أمهم، وأنا في اليوم ده قررت أن حياتي معاه لازم تنتهي، ورغم أني كنت موجوعة أن عيالي هيتحرموا من أبوهم، إلا أني كنت شايفة أني مستاهلش أعيش في الإهانة دي خصوصا أني ست متعلمة وأهلي ناس محترمين وأستاهل أعيش أنا وعيالي  حياة أحسن من كدة ". 

مبيصرفش علي عياله جنيه 

وأختتمت السيدة :"أنا كنت عارفة انه متجوز واحدة قبلي واول ما خلفت منه رماها وطلقها ومبيصرفش علي عيالها، بس مكنتش أتخيل أنه هيعمل فيا نفس اللي عمله فيها، ودلوقتي أنا رافعة عليه دعوي نفقة في المحكمة، لأن الحياة كل يوم بتزيد غلاء، وأنا مش هقدر علي مسؤليتهم لوحدي، وهو منه لله هو وأمه وقفولي في شغلانة في مدرسة كبيرة جدا ومتوفقتش فيها بسببهم،عشان كانوا خايفين أتسند بشغلي وأنجح فيه، وده مش هيبقي علي هواهم لأنهم كانوا عايزني أعيش تحت رحمتهم العمر كله،ودلوقتي أنا مش بطالب غير بنفقة لعيالي، عشان كفاية أتحرموا من أبوهم، وحرام الدنيا تيجي عليهم أكتر من كدة وهما في السن ده".